Mayoria sa elihidong vocal kaalyado ni Gob. Villafuerte

Mayoria sa miembros kan masunod na komposisyon kan junta provincial kan Camarines Sur mga kaalyado re-elihidong Gobernador Migz Villafuerte (NP) alagad an lado kan oposisyon nagpahayag na saindang susuportaran an mga programa kan jefe ejecutivo kun ini sa ikakarahay kan provincia.

Sa sampulong bagong elihidong vocal, anom sa sainda kapartido ni Villafuerte na kinababalihan ninda, Romulo Hernandez asin James Jaucian kan segundo distrito; Angel Naval asin Nelson Julia kan tercer distrito; Emmanuel Noble asin Rex Oliva kan ika-limang distrito. Mantang an apat na hali sa NPC asin kaalyado kan nadaog na candidatong gobernador Rolando Andaya Jr., iyo sinda JJ Pilapil asin Emmanuel Llaguno kan cuarto distrito; Trixie Clemente kan premir distrito; asin an nagbubueltang Vocal Dr. Ruperto Alfelor kan ika-limang distrito.

Si Vocal Llaguno kan oposisyon naglinaw na dawa bako sindang kaalyado kan gobernador ano man na magagayon na programa saindang susuportaran alagad kun disbentaje sa namamanuan kan provincia dai ninda papaboran asin dapat maaraman kan publiko.

Nakadugang pa sa anom iyo an mga ex-officio member na kinababalihan kan hali sa Sanggunian Kabataan (SK) Federation; Philippine Councilor’s League asin an pamayo kan Liga ng mga Barangay asin an presiding officer si Vice Governador elect Imelda Papin.

Sinda maasumir sa puesto puon sa Hulyo 1, 2019.

Sa presenting miembros kan junta provincial duwa sana an hali sa oposisyon na kinababalihan ninda Vokal Rusel Bañez asin Salvador Señar. Sinda dai na nakaluwas sa nagtapos na midterm elections.

Sa resulta kan pirilian sa mga elihidong alcalde mayoria may giraray kaalyado kan gobernador na igwang 19 asin 16 hali sa kampo ni Congresista Andaya.

Sinabi kan gobernador mantang mayoria sa mga elihidong vokal hali sa saiyang lado naglalaoman siya na magtatarabangan sinda sa programa kan Capitolyo provincial. (DPAureus)