Ciudad nin Naga andam na sa burokasan klase

An lokal na gobierno kan Ciudad nin Naga, Department of Education, Naga City Police Office asin an Public Safety Office, nagpahayag kan saindang kaandaman sa burokasan nin klase sa Hunyo 3 alagad dai pa mahale an problema sa bulos nin trafico sa barangay San Felipe huli ta apektado kan temporary environmental protection order (TEPO) kan corte sa DPWH na pundohon an pagputol nin kahoy sa gilid nin tinampo sagcod nakadamay an pigkokonstruhir na konkretong tinampo digdi.

Maabot sa cincuenta y siete (57) mil na mga estudiantes sa elementarya asin segundarya an maralaogan sa klase, an katorce mil digdi hale sa Camarines Sur National High School sa Peñafrancia Ave.

Sa press conference kasuodma sa City Hall na pinaapod ni Alcalde John Bongat na presente an mga opisyales hale sa DepEd, NCPO, City Health Office, PSO asin an 3rd Engineering District kan DPWH Camarines Sur, an lambang ahencia nagpahayag na igwa na sindang ginibong mga plano asin kabale na an pagwarak nin kapupulisan na mamantenir kan trafico asin paz y orden sa pagralaogan sa klase.

Sa lado kan City Health, sinabi ni Dr. Butch Borja na igwa na sindang mga ginibong fogging operation sa mga escuelahan nganing makalikay an mga estudiantes sa helang na dengue.

Sinabi ni Alcalde Bongat na kan nakaaging semana an saindang composite team nagkaigwa na nin orolay nganing andaman nin amay an burokasan nin klase mantang ngonian na school year 2019-2020 nagsakat na sa 57 mil an populasyon sa mga public school puon sa Grade I hasta Grade 12 dai pa kabale digdi si hale sa mga pribadong escuelahan.

Si Dr. Lozada kan DepEd nagsabi preparado na an saindang mga classroom mantang an saindang ratio sa ngonian sarong maestra asin treintang estudiante cada classroom sa segundarya mantang sarong maestra asin trienta hasta cuarenta estudiante sa elementarya.

An jefe ejecutivo igwa nang direktiva sa DPWH , PSO, NCPO asin kontraktor kan patrabajo sa tinampo sa brgy. San Felipe na seguradohon an pagmantenir kan trafico digdi nganing malikayan an pagkagurobot kan trafico aroaldaw.

Sinabihan kan alcalde sinda Construction Division Chief Engr. Eduardo Alejo Jr. asin Project Engr. Florante Malonda Jr. kan DPWH na presente sa press conference nganing maaraman kan publiko an problema sa proyecto sa barangay San Felipe , bugtakan nin mga karatula an kapalibotan na pendiente an kontruksyon huli kan TEPO hale sa corte. (DPA)