Nadaog man sa eleksyon matabang sa housing programs kan City Hall

‘’You can help people naman even if not elected’’. Ini an mensaje ni Abogado Arnolfo Ricardo Cabling, presidente kan Social Housing Finance Corporation (SHFC) ki Consejal Julian Lavadia Jr. kan sinda magkaulay kan Mayo 23 matapos saiyang udok sa boot na akoon an resulta kan eleksyon sa Ciudad nin Naga.

Si Lavadia, dai na nakalaog sa ‘’magic ten’’ sa grupo kan mga candidatong consejal kan Team Naga. An social housing program sa paagi kan Social Housing Finance Corporation (SHFC) na pigtulod ni Lavadia bilang pamayo kan Committee on Agriculture and Housing, ipapadagos kan lokal na gobierno sa bagong liderato kan matukaw na Alcalde Nelson Legacion.

Sa entrevista kan Bicol Mail ki Lavadia mientras na matapos na an saiyang termino sa Hunyo 30, sinabi kaini na nagkaigwang nin marhay na bonga an saindang pag-uulay sa Presidente kan SHFC na kaipuhan an saiyang tabang sa pagproceso nin mga documento nganing marealisar an social housing programs na tatawan nin prioridad si mga informal settlers na familya asin si mga residentes kan barangay na hababa an saindang income.

Hinahagad ni Cabling an suporta asin tabang kan consejal dawa mayo na sa puesto sa City Hall magtatarabangan sinda kan pagtrabajo kan mga documento asin iba pang rekisitos nganing darahon sa opisina kan SHFC.

Kan Hulyo 2018 nagkaigwa na nin Memorandum of Understanding sa pag-ultanan kan LGU Naga asin SHFC para iimplementar an housing programs nganing matabangan an mga informal settlers na mayo pang permanenteng estaran.

Pig-estorya pa kan paluwason na consejal na an saiyang program enot nang pigpresentar kaini sa grupo nin mga paraomang residentes sa barangays kan Carolina asin Pacol na an konsepto sa housing program magtatabangan an LGU asin an SHFC.

An proyecto iimplementar sa 12 hektarya farm village sa Brgy. Carolina kan SHFC asin kan LGU base sa saindang pigpirmahan na memorandum of understanding kan Hulyo 2018.

Sinabi pa ni Lavadia, base sa plano an lambang benepisyaryo magkakaigwang 500 metros quadradong lote na iyo an papatindogan nin harong, puedeng tanuman nin fruit-bearing trees, gulayon, herbal/medical plants asin puede pang mag-atamang nin hayop o piggery.