CHO nagdestino mga health workers sa escuelas publica

Huli sa kawaran nin medical personnel sa mga escuelas publica sa Ciudad nin Naga, an City Health Office (CHO) kan lokal na gobierno iyo na an madestino nin mga health workers sa treinta y nieve (39) mga escuelahan sa ciudad sa elementarya asin sa segundarya.

Si Dr. Vito ‘Butch’ Borja, City Health Officer nagsabi na an Ciudad nin Naga iyo an pinakapremiro sa Filipinas na magdestino nin health workers sa mga escuelahan asin an saindang sueldo papasanon kan lokal na gobierno.

Veinte siete nang mga health workers an pigdestino alagad si kakulangan na sampulo nakatalaan kompletohon ngonian na bulan pakatapos sana kan election ban.

Kadakle sa sainda nagtrabajo na sa mga barangay, may nakatapos na nin midwifery alagad nag-agi sinda sa seminar asin training kan CHO kan saindang trabajo sa klinika kan escuelahan, sabi pa ni Borja.

Puon kan burokasan nin klase an lambang escuelahan igwa nang klinika na may destinong health workers nganing kun igwang mga nalugadan, na-aksidente asin iba pang emerhenciang pasyente malalapatan tolos sinda nin bulong antes mag-abot an ambulancia kun kinakaipuhan darahon sa hospital.

Bako lang mga estudiantes maging paratukdo o empleados kan sarong public school puedeng magdulok sa klinika kan health workers.

Igwa nang mga gamit medikal, bulong, clinic bed asin iba pang emergency kit alagad sa mga masunod na bulan kun ubos na an suplay puedeng magtabang naman an escuelahan.

Sinda iyo an mapaabot tolos nin report sa CHO kun igwang nabungkaras na helang na kaipuhan ma-aksyonan kan ciudad.

Sinabi pa kan City Health Officers, na antes pa kan burokasan nin klase kan Hunyo 3 an saindang opisina nagconducir nin mga fogging operations sa mga escuelahan nganing makalikay an mga estudiantes sa helang na dengue.

Sa pinakahuring caso kan dengue nagbaba na an saindang alert level sa tabang nin mga health workers, mga ginibong clean-up drive nganing mawara an pigsusugokan kan dengueng namok.

Alagad nagpatanid man giraray an CHO mantang panahon naman nin tag-uran yaon naman an mga tubig sa kapalibotan na puedeng estaran nin namok asin dapat ipadagos giraray an inaapod na 4:00 o’clock habit sa mga barangay. (dpa)