DPWH 3rd Engineering District kinaltasan P874-M na fondo

Bilyones pesos an fondo kan gobierno nasyonal sa Build-Build-Build program ni Presidente Rodrigo Duterte alagad kinaltasan nin P874 an fondo kan 3rd Engineering District kan Department of Public Works and Highways (DPWH) sa Baras, Canaman, Camarines Sur.

Kan nakaaging 2018 annual budget kan engineering district dakula si fondo na nag-aabot sa P1.2 bilyones alagad ngonian na taon ginigibo na sanang P326 milyones.

Si Assistant District Engr. Richard Emmanuel Ragragio nagpahayag sa Bicol Mail na mayo sindang magiginibo kun dakulang cantidad si kinaltas na fondo na dapat magamit sa iimplementar na mga proyecto sa infrastraktura.Nakaabot na sa kaaraman ni Congresista Gabriel H. Bordado Jr. an dakulang binawas na fondo sa saiyang sakop na distrito asin nagpahayag nin pagmundo huli ta apektado an mga dapat na iimplementar na proyecto sa infrastraktura sa sakop niyang mga banwaan sa 3rd congressional district.

Alagad naglalaom sinda na posibleng magkaigwa man giraray nin supplemental budget nganing maiimplementar man giraray si mga proyecto sa infrastraktura na dapat iimplementar ngonian na taon.

Kun isagad sana kan DPWH central office an P326 milyones, sa masunod na 2020 national budget masumiter sinda nin dugang na mga proyecto para sa sunod nang taon, sabi pa kan Asst. District Engr.

Kun nagparababa an saindang annual budget an mangyayari kaini kulang man an mga proyecto, naabala pang na-aprobaran si 2019 national budget huli sa controvercia sa budget insertion kan panahon ni dating DBM Secretary Benjamin Diokno.Kabale sa apektado iyo an naka-programang road widening project, tulay maging an pagpadagos pang konstrukson nin mga school building sa escuelas publika asin dakul pang iba.An nagkaperang pig-iimplementar ngonian na proyecto sa infrastraktura si dati pang fondo kan 2018.

Si Congresista Bordado` na yaon sa partido kan opisisyon na Liberal Party namumundo huli ta dakulang cantidad an kinaltas na fondo sa saiyang sakop na distrito.An iba man na lideres kan LP sa Camarines Sur na dai na nagpasambit kan saindang pangaran nagsabi na saro sa naheheling na motibo digdi huli ta si Bise Presidente Leni Robredo taga digdi sa tercer distrito.

An Bikolanang ika-duwang pamayo kan nasyon bakong kaalyado sa politica ni Presidente Duterte.Alagad an DPWH dai man nagtaong reaksyon sa isyung ini.Napag-araman sa opisina rehiyonal kan DPWH na bako lang an congressional district ni Bordado an apektado envez an iba pang distrito kan Camarines Sur maging sa iba pang mga provincias kan Kabikolan. (DPAureus)