Humildeng Atenista

Si Reycel Hyacenth Bendana, 20 anyos, Atenista, babaeng Atenista na bakong elitista.

Nagtapos scholar asin valedictorian sa Ateneo de Manila University, nagtapos scholar asin honor student sa Ateneo de Naga University High School.

Hali sa sarong pobreng pamilya duman sa Albay, tsuper an ama, housewife an ina. Haros kulang-kulang an pagkakan aro-aldaw. Mala ngani ta si lolahon pigsayumahan sa sarong privadong ospital kan ini magkahelang ta mayo nin pan deposito.

Naguin tindera siya sa sarong sari-sari store makatipon lang nin pambalon sa eskwelahan kan siya nasa elementarya.

Edad 9 anyos, si Hyacenth kan magpangaturugan na mag-eskwela sa Ateneo de Manila University, saro sa pinaka-famusong eskwelahan sa Pilipinas kun saen nageskwela kan panahon si Jose Rizal saka si Claro Mayo Recto.

Kan sinda mag-istar sa Polangui, Albay nagporbar siyang magenrol sa privadong eskwelahan alagad dai kaya kan pamilya an matrikula, dai niya pa suno an kalidad kan pagtukdo. Lalo na sa pampublikong eskwelahan duman maluya man an standard.

Nakapasar siya sa eksam para sa apat na taon na scholarship sa Ateneo de Naga High School sa Pacol. Dai makatubod an saiyang mga pobreng magurang na maguguin siyang sarong Atenista.

500 pesos lang ang weekly allowance, 80 pesos para sa pagkakan asin pamasahe, minsan cookies saka tubig lang an saiyang pangudtuhan.

Sa eskwelahan siya poon ala 7:00 nin aga sagkod ala 6:00 nin bangui, poon ala 6:00 matabang siya sa mga kaklaseng mayayaman pag guibo nin homework. Matanga na kun siya maguibo kan sadiring assignment. Kun minsan ngani alas 4:00 nin aga kun siya minaturog. Ala 7:00 nin aga maklase na naman. Nakatapos siyang honor student sa Ateneo High School na haralo na an lalaki asin babae.

An Ateneo de Naga iyo an pigtaposan kan high school ninda Fr. Joaquin G. Bernas S.J., abogadong padi asin dating presidente kan Ateneo de Manila University, Senador Raul S. Roco, Congressman/Gov. Luis R. Villafuerte Sr., Mayor Jesse M. Robredo, Abogado Gregorio R. Castillo (bar topnotcher),Governor Winceslao Vinsons Jr.,Albay Congressman Carlos Imperial,Legaspi Mayor Gregorio Imperial, Congressman Gabriel H. Bordado Jr., President Monico Jacob kan STI, Actor Jimmy Fabregas, Professor Gregorio S. Castilla, PDI Columnist Conrado de Quiros, Congressman Salvio B. Fortuno, Congressman/Governor Joshua Pimentel asin kadakol pang iba.

An Ateneo, Manila, Naga, Davao o saen pa man sa Pilipinas pinapamahalaan kan mga pading Jesuita, eskwelahan kan mga matatali na asin mayayaman pa.

An mga Bikolano nganing mayayaman arog ki depuntong GM Ramon Abella Diaz kan GSIS asin Mayor/Congressman Ramon Hidalgo Felipe Jr. nagtarapos suma cum laude sa ADEMSU asin bar topnotchers.

Kaya an nangyari ki Hyacenth na naguin scholar sa Ateneo de Naga asin Ateneo de Manila pambihira. Babae pati siya.

Sarong pobreng aki nagka-igwa nin de kalidad na edukasyon bako lang makatabang sa sadiri, sa pamilya, sa komunidad,kundi sa kinaban.

Reycel Hyacenth Bendana, valedictorian kan Ateneo de Manila University Class 2019, nagtapos nin kursong Management Economics, cum laude, saka naguin presidente kan student council.

Sa sinurat niyang essay sa Philippine Daily Inquirrer na may titulong “A Scholar’s story”/ Young Blood, sinabi niyang an Ateneo de Naga iyo an saro sa “the best” sa Bikolandia.

Kulibat, dai niya sinabing maadal siya nin masteral on Human Rights duman sa Europa.

For comments / reactions, please contact CP Nos. 09296281848 / 09612799828 or verdaderoernesto@yahoo.com