Bordado nagsusuporta sa pagbuhay kan ROTC

Pinapaboran ni Congresista Gabriel H. Bordado Jr. kan tercer distrito kan Camarines Sur an kahurotan ni Presidente Rodrigo Duterte na liwat buhayon kan congreso an Reserved Officer Training Course (ROTC).

Alagad saiyang sinabi na mas pabor siya an dapat an maging envuelto sa training si mga estudiantes na nag-eedad na nin 18 años, dai pa bagay digdi si menor de edad na mag-agi sa military activities.

Sinabi pa ni Bordado an saiyang panindugan ipadagos an ROTC program alagad pakarhayon an mga rules and regulations tanganing maibitaran si mga enot na nangyaring kurapsyon pati na si iba pang problema na nagresulta na dagos nang tunawon ini kan mga nakaaging administrasyon.

Pigbuyagyag kan congresista kan tercer distrito kan Camarines Sur na saiyang nagigirumduman kan magkaigwa nin anomaliya sa organisasyon sagcod na nagkaigwa nin movimiento pera nang taon an nakakaagi na dagos nang tinunaw.

Sa pagtubod niya ngonian na panahon kaipuhan nang ipadagos tanganing parating andam an satong nasyon sa pagdepensa sa katalingkasan asin sa maabot pang panahon perming naka-alerto sa ngaran na seguridad.

Tanganing macierto na dai na maliwat si mga nangyaring kurapsyon kun maaprobaran asin maging ley an ROTC seguradohon sa implementing rules and regulation para malikayan an posibleng mangyari naman na anomaliya, sabi pa ni Bordado.

An organisasyon kan dating envuelto sa training sa ROTC sa manlaen-laen na colegio asin universidades sa Ciudad nin Naga asin Camarines Sur nagdulok na sa lehislador nganing suportaran an house bill na pigtutulod man ni Duterte na buhayon giraray an ROTC. (dpa)