Paraburadol na empleados dai kaipuhan kan City Hall

Sa hulyo uno iyo na an toma posisyon kan mga elihidong opisyales lokal kan City Hall alagad an matukaw na bagong alcalde kan Ciudad nin Naga amay nang nagpaluwas nin patanid sa mga paraburadol na empleados na aatubang ninda an disciplinary action.

‘’Magtultol sa pagtrabajo dai magparaburadol, inaasahan ta an gabos na empleados kan City Hall inuotob si saindang obligasyon asin ginigibo si saindang trabajo’’.

Ini an amay na mga patanid ni Bise Alcalde Nelson Legacion an masunod na alcalde kan Ciudad nin Naga matapos saiyang ganahon an resulta kan midterm elections kan Mayo 13.

An mga patanid na ini kan bise alcalde, pinahayag sa atubang kan miembros kan media sa tahaw kan paghadit kan ibang empleados sa kamugtakan ninda sa bagong administrasyon kan lokal na gobierno kan ciudad.

Gibohon sana an saindang obligasyon pagdai ko yan naheling pasensiahan na kami, sabi pa.

Nakatalaan siyang magpaluwas nin memorandum sa mga department head na dapat mag-evaluar kan mga performance kan mga empleados bako lang sa permanente envez kabale na si mga job order, casual asin contractual.

Sa pag-abot sa mga JO, casual asin contractual employees na maagi pa sa renewal an saindang nombramiento mantang mapaso na an saindang employment service sa Hunyo 30, sinabi pa na magdedefende sa resulta kan evaluation na gigibohon kan saindang department head asin iba pang opisyal, mapaluwas pa nin suhay na instruksyon na ipapaluwas sa mga masunod na aldaw.

Mapapa-amay an pagtukaw ni Legacion sa opisina kan alcalde mantang puon sa Hunyo 25 siya an magiging acting mayor mantang an paluwason na Alcalde John Bongat nakatalaan mag-viaje sa nasyon kan Canada. CITY HALL MATINDOG SA SADIRI

Sa kaparejong entrevista, sinabi pa na an saiyang vision papadalaganon niya an ciudad na nakatindog sa sadiri na kakayahon dawa dai maglaom kan ibang ‘’resources’’, we can stand independently without the national government and other agencies.

An Naga, kabale na sa mga bilyonaryong ciudades sa nasyon mala ngani ngonian na taon 2019 an saindang annual budget nagsakat na sa P1.3 bilyones.

An ciudad iyo an centro kan negosyo na padagos naglalaog digdi an mga darakulang kapitalista. (DPAureus)