PINAKAENOT SA BICOL: Cancer Center yaon na sa BMC

An pinakaenot na Cancer Center (CC) na namumugtak sa Bicol Medical Center (BMC) sa Ciudad nin Naga nakatalaan nang basbasan sa Hunyo 18 na magiging juespe de honor sinda Health Secretary Francisco Duque III, Commissioner Dante Jimenez kan Presidential Anti-Corruption Commission (PACC) asin 3rd District Congressman Gabriel H. Bordado Jr.

Nasa bagong edificio kan BMC an mga bagong ekipahes kan CC na kabale sa mga pasyenteng puedeng maka-aprobetsar kaini hale digdi sa rehiyon cinco asin sa Southern Luzon.

Si Tammy Lee kan opisina rehiyonal kan PACC sa Bikol nagpahayag sa Bicol Mail na idadagos na an nakatalaan na pagbasbas asin inagurasyon kan CC sa masunod na semana kasunod kan kumfirmasyon na makakaabot an imbitadong mga juespe de honor.

Igwa nang mga ginigibong pag-andam si OIC Medical Director Francisco Sales sa programa.

Sinda Presidential Adviser for Bicol Affairs Marvel Clavecilla, Congresista Bordado asin an PACC nagtatarabangan nganing maging operational an mga bagong edificio kan BMC kabale na an kamawotan na magkaigwa nang Cancer Center an pinakadakulang hospital sa Bikol.

An representante kan tercer distrito iyo man si padreno kan House Bill No. 8276 para sa dugang na bed capacity hale sa dating 500 gigibohon nang 1,500 kabale na an upgrading kan mga service facilities, medical equipment asin dugang na doctor asin nurses.

Naaprobaran na sa Camara-Baja an bill ni Bordado na nagpahayag nin kaogmahan an opisyales kan BMC, alagad tinikapo na sa panahon na isakat sa senado sagcod na inabot na sa pagtapos kan 17th Congress.

Sa entrevista sa congresista, sinabi kaini na liwat siyang mare-file kan bill sa masunod na 18th Congress na naglalaom siyang makakalusot man giraray huli ta importanteng marhay an ley nganing ma-upgrade an facilidades kan hospital asin dugang na bed capacity. (dpa)