SA CIUDAD NIN NAGA: Ilegal na pag-quarry dai napapapundo kan brgy.

Pigrereclamo na kan mga residentes sa barangay Cararayan, Ciudad nin Naga an padagos na ilegal na pag-quarry sa Sitio Salunguigi alagad mayong ginigibong aksyon an Barangay Council digdi nganing mapundo an ilegal na aktividad na nakakaraot sa kapalibotan.

Nagtutubod sinda na igwang police power an opisyales de barangay digdi sa pamamayo ni Punong Barangay Rodrigo Agravante alagad apesar na nag-aaragi an kargadong truck hale sa Sitio Salunguigi mayong nagiginibo kun tano ta dai pigsisitar.

Si Engr. Alexander Caning, jefe kan Environmental and Natural Resources Office (ENRO) kan City Hall nagpahayag na dapat ma-monitor man kan barangay asin puedeng dakopon an illegal aktividad sa sitio mantang yaon man sana sa laog kan saindang jurisdiksyon asin madali nindang mareparo an lugar.

Dai man makadalagan tolos an ENRO huli ta limitado an saindang personajes na dapat maghiro man an opisyales de barangay asin an jepatura de pulicia digdi na igwang Police Station.

Kinumfirmar ni Caning na base sa saindang record nagpasaro na an quarry permit kan Abril 11, 2019 na pig-isyu ki Macario Apin asin Mrs. Teresita Aringo asin considerado nang ilegal an saindang aktividad dawa sadiri pa ni Apin an lote.

Sinabi ni Caning na nagsurat na siya ki Police Major Joel Corre an jefe kan Police Station sa upper Barangay kan ciudad asin ki PB Agravante nganing magtabang sa pag-monitor asin dakupon na an mga envuelto sa ilegal na aktividad sa barangay.

Tubod si Caning na igwang police power an Barangay Council nganing mapundo an ilegal na pag-quarry asin dai siya nagtutubod na dai nag-aaram an opisyales de barangay mantang yaon sa saindang lugar nangyayari an ilegal na actividad.

Sa saiyang surat sa Police Station asin ki PB Agravante piglinaw na nagpaso na an quarry permit ninda Apin asin Aringo.