KBP/ATRACS
May sarong grupo nin mga senior broadcasters na gustong buhayon liwat an Association of TV and Radio Announcers of Camarines Sur (ATRACS) bako para sa marhay na iribanan, unidad asin propesyonalismo kundi nganing matabangan an mga taga radyo asin telebisyon (kabali na an mga technicians asin mga taga peryodiko) na may mga helang asin iba pang pangangaipo.
Sa sarong intrevista sa radyo asin telebisyon kan Sabadong aga, ki Sammy Garcia y Poloyapoy, primerong presidente kan ATRACS asin retiradong manager kan Radyo ng Bayan, 3ng beses naguin chairman kan KBP, asin ining alang-alang nagka-uroyon na buhayon liwat an ATRACS.
Sa presenting kamurugtakan na dakul na mga broadcasters arog ki David Dollano, Ramon Ranola, David Nopre, Mrs. Belen Babar asin an technician na si Weng Morato Nieva na may mga sakit ngonyan kaipuhan na marhay an tabang kan mga kabado sa propesyon tanganing makatabang man lang sa bulong, paragastos asin iba pang pangangaipo. Kuta na ngani kun may panahon bisitahon man ninda an mga pasyente sa ospital o sa harong.
Kan enot an ATRACS nagamit sa politika mala ta sarong dakulang politiko na kan dai niya mapakinabangan an organisasyon nagsugo siyang gadanon ini labing sarong dekada na an nakakaagui.
Pero ngonyan mayo na nin politika sa ATRACS. Pati an ayuda na itatao sa mga nanunungdan na pasyente dapat direktamenting itao sa saindang sadiring bank account number na dai na maagui sa kamot kan ATRACS tanganing mayong masabi. “Leg work” na sana an trabaho kan vulonteer organization.
Diyan na maheheling an sinceridad kan lambang broadcast practioner asin an pig-aapod na public service o serbisyo publiko.
May mga gusto nang magtao kan saindang voluntad na tabang an mga senior broadcasters arog ki Elmer Abad na saro sa mga founders kan ATRACS, Judge Celso Baguio, Director Ric Diaz, pati an balik-bayan na si Jojo Amador. Si Ervin Borja kan Ok Fm/PBN 5, Ernie Abragan asin Wally Vargas kan DWLV- Fm, maski si Congressman Sal Furtuno na considiradong Godfather kan Bikol media, matarabang man. An balik-bayan na si Jing Florece haling Canada na orihinal na miyembro kan ATRACS maayon man.
Sa abroad apuera ki Sammy Garcia na maestar duman sa New York City USA nin sarong taon, an mga arog ki Fiorel Salvo, Noli Orbeta, Jun Lagrimas, Vic Samson, an parasurat na si Prof. Greg Castilla, Al Villamora, Awel Aureus matarabang man.
Digdi sa Bikol an mga retiradong broadcasters arog ki Atty. Henry Briguera (original ATRACS chairman kan 1977), Donya Lina Paglinawan, Donya Elaine Parma Orong, Atty. Peachy Alfelor-Moralida, manager Al Ubana, manager Amy Garcia Villafuerte, Don Zing Paglinawan, director Salvador Royales, Badong-badong Alcantara, Vangie Pontejos asin siyempre an bagong Congresswoman na si Josal Faustino Fortuno matarabang man.
Paguiromdom kan ATRACS sa mga ngonyan mababaskog pang broadcaster asin mediamen na magurang man sinda asin manganga-ipo man nin tabang pag-abot kan panahon. Ngonyan magdeposito na sinda tanganing may butbuton ngapit.
An KPB kaya organisasyon lang kan mga kapitalista, may sadiri asin operators kan mga estasyon asin networks nin mga radyo asin telebisyon. An mga managers representates sana ninda sa local na KBP. Marhay kun may ikaherak, kun mayo pasensya na.
An mga accredited members kan KBP igwa man 100mil pesos na insurance kun magadan. Kun dai accredited sorry na lang.
Arog kaiyan an buhay, swerte o kadimalasan, kan sarong broadcaster o mediaman.
For comments/ reactions, please contact Cp nos. 09296281848/09612799828 or verdaderernesto@yahoo.com/fb: Ernie Verdadero