Manga DE kan DPWH inukag ni Sec. Villar

Pigpunan nang ukagon kan opisina central kan Department of Public Works and Highways (DPWH) an mga opisyal kan engineering district sa Bicol na pigpunan na sa Camarines Sur asin Catanduanes.

An memorandum order hale ki DPWH Secretary Mark Villar kasunod kan toma posisyon puon kan Hulyo Uno kan mga congresista asin opisyales lokal.

Si District Engr. Rebecca Roces kan 3rd Engineering District kan DPWH sa Camarines Sur naghahalat nalang nin karibay nganing idestino sa Ciudad nin Legaspi alagad an saiyang Assistant District Engr. Richard Emmanuel Ragragio madedestino na sa sulong distrito kan Catanduanes asin na-promote na bilang district engineer.

Si Ragragio, hinagad ni Gobernador Joseph Cua kan Catanduanes na madestino sa saiyang provincia.

Si Engr. Cesar Moral Jr., jefe kan Planning and Design Section iyo an matukaw na OIC Assistant District Engineer kan 3rd Engineering District.

An OIC DE kan DPWH Catanduanes si Engr. Augustus Balmadrid iyo an pigribayan ni Ragragio.

Sa 1st Engineering District kan Camarines Sur si OIC DE Edy Ferdinand Joven igwa nang special order hali ki Secretary Villar.

An iba pang engineering district sa Albay asin Camarines Norte iyo man an isusunod naghahalat nalang nin memorandum order.