Naval, tinukahan magpugol kan ad hoc committee sa SP
Pili, Camarines Sur – Si Vocal Angel Naval kan tercer distrito kan Camarines Sur iyo an tinukahan kan Sangguniang Panlalawigan na maging chairman kan Ad hoc committee sa ginibong enot na sesyon regular kan Lunes, Hulyo uno nganing adalan kun dapat dugangan an presenting treinte y saes (36) na mga komitiba kan SP.
Hehelingon kan ad hoc committee kun igwang dapat tunawon na komite o macrear nin bago na kaipuhan kan gobierno provincial sa pagtarabangan kan lehislatura asin kan jefe ejecutivo, sabi ni Naval.
An mga opisyales lokal formal na nag-asumir sa puesto alas doce uno nin udto kan Hunyo 30 asin Hulyo uno tolos nagpaapod nin sesyon si Bise Gobernador Imelda Papin nganing magcrear nin ad hoc committee asin mapunan na an proceso sa mga manlaen-laen na komite na pupugolan kan mga miembros kan SP.
Alagad sinabi pa ni Naval sa maabot na Viernes, Hulyo 5 nagtalaan liwat sinda nin sesyon nganing maaraman kun igwang bagong nacrear na komite asin isusunod na ninda an distribusyon kan mga committee chairmanship.
Si Bise Gobernador Papin nagpahayag sa miembros kan media na dai man ninda ipapangemot an mga komite nganing itao man sa pag-iriba nindang vokal na nasa oposisyon.
Alagad sinabi kan pamayo kan ad hoc committee na magdedefende sa mayoriang miembros an pagpili kan makapot kan mga komite mantang kaipuhan man giraray ninda dapat nasa mayoriang miembros an mga importanteng komite nganing maging katuwang ni Gob. Villafuerte sa saiyang mga agenda sa pagpadalagan kan Capitolyo Provincial.
An mga miembros kan SP na bakong kaalyado kan jefe ejecutivo kinababalehan ninda Vokal Emmanuel Llaguno asin Jayjay Pilapil kan cuarto distrito, Trexie Clemente kan premirong distrito asin Dr. Ruperto Alfelor kan ika-limang distrito.
Sinabi ni Llaguno na andam sindang magcooperar sa gobernador kun ini para sa ikararahay kan gobierno provincial asin para sa interes kan namamanuan kan Camarines Sur.
An saindang sesyon regular gigibohon cada alas dos nin hapon sa aldaw nin Miercules. (DPA)