Paggamit nin manga plastic ibabawal na sa 2 LGUs sa CSur

Duwang lokal na gobierno sa Camarines Sur an estricto nang ibabawal an paggamit nin mga plastic, styrofoams asin iba pang kaparejong materyales parte kan saindang programa sa kapalibotan.

Sa Ciudad nin Naga, si Alcalde Nelson Legacion nagpaluwas nin executive order alagad limitado sana an saindang implementasyon sa ano man na actividades na gigibohon sa laog kan City Hall mientras na sa Pili, Camarines Sur sinabi ni Alcalde Tomas Bongalonta na nagpasar sinda nin ordinansa bako lang sa saindang municipio envez kabale sa mercado.

An pagbawal sa paggamit nin mga plastic, styrofoams asin iba pang kaparejong materyales sa ano man na actividades sa City Hall pig-anunciar ni Alcalde Legacion sa saiyang toma posisyon kan Hulyo Uno nganing pakusogon an programa sa Environment asin ini kabale sa prioridad niya sa enot na sangatos diyas sa pagtukaw sa puesto.

Sa entrevista man kan Bicol Mail ki Johaan Dela Rosa, pamayo kan Naga City People’s Council (NCPC) sinabi kaini na saindang pinapaboran an programa kan alcalde sa kapalibotan asin saindang pigrecomendar na mag-isyu na nin executive order mientras na pendiente sa Sangguniang Panlungsod an propuestong ordinansa na may titulong ‘’Ordinance prohibiting the use of plastic bags in dry goods, regulating its utilization on wet goods, and providing penalties for violation thereof’’.

An ordinansa yaon pa sa Committee on Environment ni Consejal Salvador Del Castillo asin liwat niyang isusunad ngonian na 13th Sangguniang Panlungsod sa pamamayo ni Bise Alcalde Nene De Asis.

Sinabi ni Alcalde Bongalonta an LGU Pili, pigtulod na magkaigwa na nin ordinansa contra sa paggamit nin mga plastic huli ta ini an nakakabara sa mga drainage sa saindang banwaan na nagiging causa kan tubig baha.

Antes estrictong iimplementar magkakaigwa muna sinda nin mahiwas na information drive, sabi pa ni Bongalonta. (dpa)