Pagpahiwas kan aeropuerto liwat pinangako ni Gob Migz
Pili, Camarines Sur - Perang taon nang pendiente an expansion sa runway kan Naga Airport na proyecto kan Department of Transportation (DOTr) sa banwaan na ini alagad liwat nagpangako si Gobernador Migz Villafuerte na tatawan niyang prioridad na matapos an proyecto sa laog kan saiyang huring termino.
An siisay man na makontra, siya na an makakalaban.
Ini an mga pahayag sa miembros kan media ni Gob Villafuerte kasunod kan saiyang pag-asumir liwat sa puesto sa ika-tolong termino matapos saiyang daugon sa eleksyon nin labi sa cinco mil na boto si Majority Floor Leader Rolando Andaya Jr.
Maging sa saiyang pag-atubang sa sesyon regular kan junta provincial, saiyang sinabi tatawan niya nin atensyon na matapos na an rehabilitasyon kan aeropuerto mantang dakulang bagay ini para sa programa sa turismo kan Camarines Sur.
Naabala an implementasyon kan proyecto huli kan problema sa land acquisition na apektado an mahiwas na kaomahan na naghihinayan an mga paraoma mantang irrigated an saindang paroyan na perming halangkaw an produksyon nin paroy cada aranihan.
Kabale sa apektado mga kaomahan iyo an daga na sadiri ni Alcalde Tomas Bongalonta na kasurog kan mga paraoma sa barangay San Agustin na nagkokontra na sakupon an saindang daga na napapakinabangan para sa pagbuhay kan saindang mga familia.
An proyecto pigpunan an proceso kan panahon na Gobernador pa si 2nd District Congressman LRay Villafuerte.
An pagpahiwas kan aeropuerto suporta kan Metro Naga Chamber of Commerce and Industry Inc. asin kan Camarines Sur Chamber of Commerce and Industry Inc.
Nagtutubod an joven na gobernador asin an sektor nin negociantes na makakatabang sa economia kun marealisar na an proyecto sa aeropuerto.
Pangiturogan pa niya na madagos an Railway system na ibubugtak sa viente hektaryang lote an Bicol Central Station sa kabesira kan provincia.
Si Villafuerte, Bise Gobernador Imelda Papin, mga kaalyado sa PDP-Laban na miembros kan junta provincial nagsumpa sa puesto sa atubangan ni Senador Cynthia Villar.
An actividad ginibo sa Capitolyo Provincial, nagsabay na an 19 sa 36 na mga alcalde sa provincia na miembros kan PDP-Laban. (dpa)