Viaje kan PNR sa Legazpi ibubuelta
Saro sa pinakalomang train kan Philippine National Railways ginagamit sa regular na viaje aroaldaw sa rutang Ciudad nin Naga sundo sana sa Sipocot, Camarines Sur. (DPA)
Nag-aandam na an manijamiento kan Philippine National Railways (PNR) sa Bicol tanganing ibuelta an regular na viaje kan perrokaril haling Naga PNR Station abot sa Ciudad nin Legazpi na posibleng marealisar antes kan Peñafrancia fiesta sa Septiembre 2019.
Alagad kaipuhan munang hirahayon an tulay sa Sariyaya, Quezon na iyo an aagihan nin mga kotse kan train haling Manila na iyo an gagamiton sa regular na viajeng Naga-Legazpi.
Si OIC Manager Antonio Bare kan PNR Station sa Ciudad nin Naga nagpahayag sa Bicol Mail na pighahalat nalang ninda an pag-viaje kan crane na yaon sa Ciudad nin Naga pasiring sa Sariyaya, Quezon na iyo an gagamiton sa paghirahay kan tulay.
Kaipuhan madara sa Naga PNR Station an nagkaperang mga kotse tanganing madagos na an pigtalaan na pagbuelta kan viaje kan perrokaril pasiring sa provincia nin Albay, sabi pa ni Bare.
An crane guguyodon kan unikong makina kan Naga Station na iyo man an ginagamit kan commuter train sa Ciudad nin Naga.
An problema oras na magviaje an tren pasiring sa Quezon masususpende an viaje kan commuter train sa Camarines Sur na igwang regular na ruta haling Naga Station sundo sa Sipocot Station, sa banwaan nin Sipocot, CamSur.
Aaboton nin limang aldaw na temporaryong cancelado an viaje sagcod na dai pa na-ibubuelta an makina nganing magdalagan giraray an commuter train.
Nag-inspeksyon na an mga engineers kan perrokaril sa mga relis kaini pasiring sa Ciudad nin Legazpi asin mayo man nahelingan nin problema nganing makaulang sa pagbuelta sa viajeng Naga-Legazpi, segun pa sa pahayag sa BM kan OIC Manager.
Kun marealisar an viaje pasiring sa provincia nin Albay piglalaoman na dakul an mga pasajeros digdi huli ta barato an flete kumpara sa bus asin van mantang aaboton sana nin labing sarong oras an viaje.
Kan nakaaging taon nagpadagos an viaje sa rutang Naga-Legazpi alagad pinapundo kan manijamiento mientras na kulang nin kotse na iyo muna an ginagamit sa Manila.
Sa ngonian hinahalat pa kan PNR Bicol kun nuarin puponan an proyecto sa modernisasyon kan perrokaril kasunod kan enot na mga pahayag sa miembros kan media ni General Manager Junn Magno kan ini mag-atubang sa press conference kan bulan nin Mayo ngonian na taon.
Sinabi ni Magno na magkakaigwa nang Bicol Bullet Train Transport System sa irarum kan Build-Build-Build program ni Presidente Rodrigo Duterte mantang nagsikad na an rehabilitasyon kan PNR sa Lucena asin Quezon.
An fondo nagcacantidad nin P175 bilyon hale sa inutang kan gobierno Filipinas sa nasyon kan China.
Target ni Magno na matatapos an proyecto sa 2021 asin magiging operational sa 2022. (DPAureus)