Fishing Port sa CamSur pig-condemn kan PACC

An Sabang Fishing Port sa Calabanga, Camarines Sur na pinabulosan nin P50 milyones na fondo kan nakaaging administrasyon ni dating Presidente Benigno ‘’Noynoy’’ Aquino III pig-condemn na kan Presidential Anti-Corruption Commission (PACC) kasunod sa rekomendasyon kan Inspection Team kan Department of Public Works and Highway (DPWH) Bicol.

Enot nang nagaba an seawall asin luway-luway man na nagtatagilid an edificio sagcod na nagdesisyon na dai na gamiton huli ta delicado sa aksidente, sabi sa Bicol Mail ni Regional Consultant Tammy Lee kan PACC Bicol.

Sinabi ni Lee an Inspection Team pinangenotan ni Engr. Ediberto Ativo kan opisina rehiyonal kan DPWH na enot nang pigplano na gabaon envez pigrekomendar na dai na gamiton ta nagtatagilid an edificio.

Nagpapadagos na an imbestigasyon kan PACC sagcod na puedeng pasimbagon an responsable sa proyecto na sub-standard an patrabajo, segun pa ki Lee.

Sa inisyal na imbestigasyon kan PACC kabale sa nadiscobre an dating Department of Transportation and Communication (DOTC) na ngonian DOTr na iyo an nag-implementar kan proyecto envez na dapat an Philippine Fisheries Development Authority (PFDA).

Pigbuyagyag pa kan consultant kan PACC Bicol na kan saindang makaulay an sarong opisyal kan PFDA , ipahayag na nabigla sinda kan maaraman na an nag-iimplementar kan proyecto sa Fishing Port iyo na an DOTC asin dai sinda nag-aaram.

An PFDA iyo an awtorisado na mag-implementar alagad dai pinaaram kan DOTC, sabi pa. Kasabay sa proyecto iyo an Ice Plant na dai tolos nagamit alagad naging operational ngonian nang panahon ni Presidente Rodrigo Duterte asin Usec Marvel Clavecilla.

Nadiscobre pa kan PACC na kan ikonstruhir an proyecto mayong building asin construction permit, pig turn over an proyecto sa Barangay Council bako sa lokal na gobierno sa pamamayo ni Alcalde Eduardo Severo, asin mayo man nin resolucion an Sanggunian Bayan na dapat recibihon kan barangay council an proyecto.

An proyecto narealisar kan panahon ni Bise Presidente Leni Robredo kan siya Congresswoman pa kan tercer distrito kan Camarines Sur.

Ipinahayag sa BM kan staff kan bise presidente na kan panahon ni Congresswoman Robredo, siya sana an naghanap nin fondo na madadara sa Calabanga, Camarines Sur alagad dai naki-araman sa implementasyon kan proyecto. (dpa)