PACC mayong pasaway na opisyal

An Presidential Anti-Corruption Commission (PACC) sa Bicol nagpahimotik sa nagluwas na bareta sa sarong peryodiko nasyonal na igwang opisyal kan commission na sarong Bicolano na pigbunotan nin de calibreng armas an sarong security guard sa Ciudad nin Taguig.

Si Regional Coordinator Tammy Lee kan PACC Bicol nagpahayag na mismo si Chairman Dante Jimenez kan commission an naglinaw na dai konektado sa sainda an nginaranan na Mariano Jose Villafuerte III na bestado sa Camarines Sur sa apod na ‘’Bong’’ Villafuerte.

Si Villafuerte, inarestar kan Taguig City Police huli sa reclamo kan security guard na nagbunot nin kargadong bala nin calibre 9mm huli kan mainit nindang argumento.

An insidente nangyari kan nakaaging Lunes sa atubangan kan hospital sa Fort Bonifacio asin nagpapabisto si Villafuerte na Director for Intelligence Investigation kan PACC.

An biktima nag-apod sa PNP na tolos nagpasiring sa saindang lugar asin inarestar an suspechado sagcod na dinara sa Police Headquarter.

Nakumfiscar sa saiya iyo an 9mm pistol, na may laog nin tolong magazines, 48 bullets, asin licensiado an armas.

Sinabi pa kan PACC na mayo sindang intelligence investigation division asin nongka mayong pangaran na Villafuerte na miembro kan commission.

Dai na nag-arabutan sa pagsangat nin caso sa corte asin nakaluwas na sa detention si Villafuerte matapos magpa-areglo an biktimang security guard.