Walong pulis kan NCPO tatawan komendasyon

Namumundo si Consejal Vidal Castillo sa nagdadakul na mga menor de edad an nagiging envuelto na sa harabonan na saro siya sa mga biktima matapos salakaton an saiyang bodega sa Sona cinco, sitio Clupa kan barangay Calauag asin nagkadarakop tolos an mga suspechado mantang pig-aandam na an pagtao nin komendasyon sa mga apprehending officer.

Sarong 19 años an lider kan limang mga menor de edad alagad huli sa marikas na pagresponde kan Composite Team sa pamamayo ni Police Major asin Station Commander Van Layosa kan Peñafrancia Police Station dai ngani nag-veinte cuatro oras nadakop an mga parahabon.

Si Castillo, sa saiyang privilege speech nagpahayag ini nin pagsaludo sa lider kan Composite Team asin sa mga miembros kaini na kinababalehan ninda Police Staff Sgt. Florante Aladin Jr., Police Staff Master Sgt. Norman Borbe, Police Corporal Marjhon Avillanosa, P/Cpl. Romar Advincula, P/Cpl. Alvin Adan, asin P/Cpl. Cham Garciano, sa saindang maigot na pagresolba asin pagkakadakop sa anom na suspechado sa paghabon sa bodega na sadiri kan consejal.

An consejal matapos kan saiyang privilege speech nagpadreno nin resolucion nganing tawan nin komendasyon an mga awtoridad.

An resolucion pigsuportaran kan gabos na miembros kan 13th Sangguniang Panlungsod sa pamamayo ni Bise Alcalde Nene De Asis bilang presiding officer asin pigtalaan itao an komendasyon sa Lunes, Hulyo 29.

Aprobado na ni Alcalde Nelson Legacion an resolucion asin ini iyo an ‘‘Resolution recognizing and commending the composite team of the PNP-Naga led by Major Van Layosa, IOC P/SSG Florante Aladin Jr., P/SMS Norman Borbe, P/Cpl. Marjhon Avillanosa, P/Cpl Romar Advincula, P/Cpl. Alvin Adan, asin P/Cpl. Cham Garciano, for the immediate response and successful apprehension of persons involved in a robbery incidente, at barangay Calauag, this City’’.

Sa piglansar na hot pursuit operation kan MotorCycle Against Crimen (MOCAC) asin kan Composite Team nagkadarakop man sana an mga suspechado mientras na anas man sana mga residentes kan Sitio Clupa asin an lider kan grupo pigngaranan na si Jojo Luyas, 19 años, asin an lima niyang mga pag iriba na anas menor de edad nin 14, 17, 17, 15, asin 12.

Sa pagkaka-arestar ki Luyas sa imbestigsyon kan PNP an grupo kan suspechado dati nang envuelto sa nagkapera nang harabonan sa Barangay Calauag asin Villa Karangahan Subdivision.

Sa record sa Naga City Police Office an casong crimes against property iyo an nangengenotan na kabale sa envuelto iyo an mga menor de edad.

Nabawi kan mga pulis sa lugar kan pigtataguan na pigtutubodan hinabon man sa mga tiendahan iyo an mga gamit sa harong, walong kahon nin sapatos, na may laog nin vans shoes asin sarong plastic ban na may laog nin siyam na bundles of black and blue short pants asin dakul pang iba.

An lider asin pag-iriba sinangatan na nin caso asin pig-inquest na sa City Prosecutors Office.

An insidente nin panghahabon sa bodega kan consejal nangyari kan Hulyo 7, 2019 na pigraot an treinta y nieve (39) switch asin outles na nakakabit, kinua an gabos na electrical wires asin iba pang materyales kabale na si mga ekipahe na nagcacantidad nin Php.90,398.00