Muslim Community sa Naga pabor sa death penalty

Pinapaboran kan Muslim Community sa Ciudad nin Naga an pagbuhay liwat kan death penalty sa mga caso na envuelto sa makangerat na krimen.

Alagad hinahagad kan grupo kan Muslim na kaipuhan magkaigwa nin safety nets tanganing malikayan na maging anti-poor an implementasyon kan castigong bitay.

Ini an mga pahayag ni Mike Mustapa, lider kan Maranao for Solidary Guild, organisasyon kan mga Muslim sa ciudad.

Sa ngonian duda pa sinda kan dalagan kan justicia kaya kaipuhan munang pakusogon an justice system sa nasyon na dapat seguradohon na matatawan nin proteksyon an mga akusado orog na si nagtitirios na mayong kakayahan na magkua nin mga abogadong de kampanilya.

An reaksyon kan mga nag-eerok sa Naga kan grupo kan Muslim kasunod kan hinahagad ni Presidente Rodrigo Duterte sa Congreso sa saiyang ika-apat na State of the Nation Address (SONA) dapat ipasar an propuestong ley sa death penalty si mga envuelto sa ilegal na droga asin pandarambong o plunder.

An justice system saro sa mayor na isyu na hinahagad kan manlaen-laen na sektor maging kan ibang mga halangkaw na opisyal kan gobierno asin progresidong grupo mientras na an kahirak-hirak kan magabat na penalidad iyo an mga pobreng akusado.

An naheheling digdi na posibleng dakul na mga inosente an mabitay sagcod na dai pa puedeng pagtiwalaan an ibang korte herak man kan mga biktima.

An congreso, nagtutubod na liwat makontra digdi an simbahan catolico na haloy nang naninindugan laban sa death penalty.

Kan nagtalikod na 17th Congress an propuestong death penalty bill nakalusot sa Camara-Baja alagad pagsakat sa senado mayong nangyari iginilid sana kan mayoriang miembros.