Nag-iirinuman pigmasaker, apat gadan

Bula, Camarines Sur – Pina-uranan nin bala kan calibre 45 asin 9mm pistol an apat na nag-iirinuman sa saindang Kambingan Karenderiya sa Sona uno kan barangay Fabrica sa banwaan na ini, anas binawian nin buhay na pigdalagan pa sa hospital alagad pigdeclara kan attending physician na mayo nang buhay an mga biktima.

Si Police Major Fernando Cedo jefe de pulicia kan Bula Municipal Police Station nagpahayag an madugong insidente nangyari mga alas 8:20 nin banggui kan Martes, Hulyo 30 mientras na nag-iirinum sinda Rodelio Pagtalon-an y Carcillir, an saiyang tugang na si Nathaniel Pagtalon-an asin Orlando Baladad y Dodon, 50 años asin nakadamay pa an saiyang esposa na si Chuchi Baladad y Pagtalon-an, pinagbabadil nin haranihan an mga biktima sagcod na tinamaan nin mga bala sa manlaen-laen na parte kan hawak an apat na mga biktima.

An duwang mga responsable sa krimen parejong nagpaputok kan saindang armas haranihan sa lamesa kan nag-iirinuman na biktima, pigseguro kan mga gunman na ubos an nag-aaratubangan sa inuman.

Sinabi pa an saro sa suspechado naka-jacket asinn nakakopya mientras an kaibanan kaini naka-polo nin kolor pula asin asul.

Segun sa mga testigos an kaggibo naheling naglalakaw-lakaw padulag na garong mayong nangyari asin pigtutubodan pasiring sa Baao, Camarines Sur.

Sa lugar kan krimen nakakua an mga awtoridad nin 32 pidasong live ammunition kan calibre 45 asin 9mm pistol.

Sa inisyal na imbestigasyon kan Bula MPS, sinabi ni Major Cedo na ‘’inggit sa negosyo’’ an motivo kan krimen alagad nagpapadagos pa sinda kan ibang angulo kan caso mantang an mga suspechado aram na kan awtoridad alagad dai na muna pigbuyagyag sa media an saindang pangaran.

An mag-agom na Orlando asin Chuchi Baladad asensado nang negosyante sa barangay. Sinabi pa an gunman posibleng bayadan na paragadan.