Towing operator naghahanap impounding area, sabi kan PSO

An lugar nalang kan impounding area kan mga mabubutong na vehiculo na padagos magsisinutil sa traffic ordinance kan Ciudad nin Naga iyo na sana an nakakaabala nganing iimplementar na an towing ordinance. Ini afuera kan accreditation na nakatalaan aprobaran sa Sangguniang Panlungsod antes makapuon kan saindang operasyon an towing operator na hasa na sa saindang trabajo sa Metro Manila.

Si Rene Gumba, jefe kan Public Safety Office (PSO) kan City Hall nagsabi na kabale sa pigpipilian na lugar iyo an barangay Pacol, na enot nang igwang napiling lugar sa Magarao, Camarines Sur alagad sinayumahan kan ciudad.

An ordinansa padreno si Consejal Joselito Del Rosario, pamayo kan Committee on Transportation na-aprobaran kan nakaaging 12th Sangguniang Panlungsod sa pamamayo kaidto ni Bise Alcalde Nelson Legacion bilang presiding officer.

Kan panahon ni Alcalde John Bongat nakatalaan na kuta nang iimplementar kan Agusto 1, 2018 alagad dai pa preparado an City Hall mientras na mayo pang nagpepresentar na towing operator asin dai pang lugar para sa impounding area nin mga vehiculos.

Oras igwa nang accreditation an towing operator asin preparado na kan saiyang impounding area puede nang iimplementar an ordinansa, sabi pa ni Consejal Del Rosario.

Sa ngonian an pig-iimplementar muna kan PSO iyo an well clamp ordinance sa commercial district 1 and 2 alagad an expanded well clamp ordinance isasabay na sa pagsikad kan towing ordinance.

An masinutil sa towing ordinance sa enot na pagbagla mamulta nin cantidad P500, sa ika-duwang pagsinutil P1,000 asin P1,500 sa ika-tolong veces na pagkakadakop.

Base pa sa ordinansa an 60 por ciento sa makokolektang multa madalagan sa operator asin 40 por ciento sa City Hall.