Apat na diputado sa Bicol hagad isikwal an prov’l bus ban sa Edsa

Tolong aldaw matapos kan privilege speech ni Congresista Gabriel H. Bordado, Jr. sa ika-18th Congress sa isyu contra sa pagbawal sa paglaog kan gabos na provincial buses sa Epifanio de los Santos Avenue, sa Metro Manila an Regional Trial Court sa Ciudad nin Quezon nag-isyu nin injunction order na nagpapapundo sa nakatalaan nang provincial bus ban sa kalabaan kan EDSA.

Nagtatarabang na an nagkaperang mga congresista sa Bikol, afuera ki Bordado enot nang nagsangat na nin petisyon sa Corte Suprema sinda AKB Party list Representative Alfredo Garbin asin Albay Congresista Joey Salceda na naghuhurot pundohon an pag-implementar kan ban asin yaon man an suporta ni CamSur 2nd District Congresista LRay Villafuerte na nagplantiar na nin resolucion na hinahagad sa Camara-Baja na imbestigaraan an provincial bus ban sa EDSA.

Nagpasalamat an congresista kan tercer distrito kan Camarines Sur sa pinaluwas na injunction order kan Quezon City RTC 223 ni Juez Caridad Walse-Lutero na nagpapaundo sa Metropolitan Manila Development Authority (MNDA) asin Land Transportation Franchising and Regulatory Board (LTFRB) mantang masikad na kuta na an implementasyon kan provincial bus ban kan Agusto 7.

An injunction kasunod kan pig-plantiar na petisyon kan nagkaperang provincial bus operators na saindang pig-rereklamo an ban na magbabawal sa sainda na maglaog sa Metro Manila via Edsa, ma-aapektaran an saindang pagbuhay maging man an rinibong pasajeros.

Parte kan privilege speech ni Bordado, ‘’Mr. Speaker, I am therefore, appealing to you and all colleagues to join me in resolving this critical issue. I am urging the LTFRB and the MNDA to abandon the ban and instead come up with other possible approaches which will not only provide us with temporary relief but a rather lasting solution that cuts into the very root of the crisis instead of just skimming the top of the issue.’’

Nakapuntos tolos an mga Bikolano na apektado sa plano kan duwang ahencia dawa temporaryo muna huli ta dakulang desventaje sa rinibong pasajeros hali sa rehiyon cinco maging sa Visayas asin iba pang rehiyon, sabi pa ni Bordado.

Sa desisyon kan Corte, nagkaigwang ‘’abuse in the issuance’’ an LTFRB Circular na nagbabawal sa provincial buses sa EDSA, asin an MNDA regulation na nagre-revoke sa business permits sa gabos na provincial bus terminals sa saindang ruta na nag-aagi sa EDSA.

Segun pa sa jusgado, nagkaigwa pang inaapod na ‘’far reaching effects sa mga negosyo asin maging sa saindang mga empleado an kasugoan kan ahencia.

Dai bensido an jusgado sa kasugoan kan LTFRB asin MNDA sa pag-ban kan mga bus huli ta mayong naheheling na pagkakaiba sa provincial bus asin sa mga premium point-to-point buses na dai man sakop kan ban.

Sinabi pa sa desisyon an LTBRB asin LTFRB mayong ginibong konsultasyon sa apektadong sektor asin saindang inabuso an police powers kan enmiendahan an ruta kan provincial buses asin tolos nagsugo na sarahan an mga provincial bus terminals. (dpa)