Bunyog Bikolandia

Si Atty. Ricky Tomotorgo, abogado,law professor, technocrat asin aktibista nagbibilog nin grupo y movimento na pig-aapod niyang “Bunyog Bikolandia”. Sa tv/radyo interview kan Sabado, sinabi niya na an tuyo kuno kan bagong organisasyon iyo an ipaglaban an kapakanan kan Kabikolan. Saro sa mga ipinaglalaban ninda iyo an kontrahon an plano kan Metro Manila Development Authority (MMDA) na bawalan an pag-laog kan mga pampasaherong bus hali sa mga provincia pasiring sa laog kan Metro Manila partikularmente sa kalabaan kan Edsa. Apektadong marhay an mga biyaherong hali sa Kabikolan patin Kabisayaan. An obheto kan MMDA sa pagbabawal kaini iyo an mapagian daa an magabat na trapiko sa Kamaynilaan orog na sa Edsa.

Nagboses sa Kongreso por medyo nin sarong privilege speech si Congressman Gabby Bordado kan tierser distrito kan Camarines Sur kontra sa MMDA na magkaka-igwa na nin dry run sa maabot na semana. Nagboses naman si Congressman Joey Salceda kan Albay asin si Congressman Pedong Garbin kan Ako Bikol Partylist.

Dakula an boses ninda kontra sa implementasyon kan plano kan gobyerno nasyonal.

Enot kaini, sa social media/facebook nagborotwaan na an pangapodan sa MMDA na dai idagos an planong ini.

Saro sa mga enot na nagibsaw sa FB an techno-journalist na si Ompong Baldemor, regent saka director kan Corporate Social Responsibility Department kan Naga College Foundation, na nangapodan sa mga lideres kan Bikol na kontrahon an plano kan MMDA ta herak man kan mga pasaherong mapa Manila lalo na an kinapobrehan, mga gurang asin may kadenan.

Ini an pinakadakulang angat ngonyan bako lang sa Bunyog Bikolandia, sa mga politiko arog ki Vise-Presidente Leni Robredo, Usec. Marvel Clavecilla, PACC Chair Dante Jimenez, Senador Francis “Tol”Tolentino asin iba pa, sa mga taga medya asin sa mga organisasyon arog kan Sumaro Bikolnon, Pag-iribang Bikolnon, Sarong Banggi Organization International, Cam Sur and Metro Naga Chambers of Commerce and Industry. Gurano talaga kita kasararo asin kaburunyog bilang mga Bikolano?

***** Mga Feedbacks hali sa mga parabasa;

Dakulang mabalos po sa pagkogos kan satong tataramon na Standard Bikol maski ngani dakul na ibang lengguwahe an Bikol. Magayon na sinabi mo na kan Bibliya buda simbahan an nagbuburugkos sa satong manga Bikolnon- Tony Moran, reader of Tabaco City ***** Parehong magayon an sinurat mo tabi.

A. On Magbirikol Kita - garo po baga kadakol ng nawarang orihinal na tataramon. Naribayan na nin iba. Mas musika pagdangogon an Bikolnon ta kadtong panahon.

B. On Leni, I agree with you. Strong tandem sindang duwa. I think PRRD should also be thankful that Leni keeps him on his toes.- Dante de Leon, Marikina City Metro Manila. ***** Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Ervin Borja and Ernie Verdadero.

May mga espesyal na bisita.

Diyos mabalos.

For comments/ reactions, please contact Cp nos. 09296281848/09613638409 or verdaderernesto@yahoo.com/fb: Ernie Verdadero Website: www.bicolmail.net