Nagmasaker sa highway namidbid na kan PNP

Bula, Camarines Sur - Namidbid na kan mga awtoridad sa banwaan na ini an duwang mga responsable sa pagmasaker sa tolong mga biktimang magturogang asin saro pang kaibanan na nangyari alas 8:20 nin banggui kan Hulyo 30 sa gilid kan highway sa Sitio Pecuaria, barangay Fabrica.

Alagad sinabi ni Chief of Police Col. Fernando Cedo kan Bula Municipal Police Station pinagmarhay na itago muna ninda an mga pangaran kan suspechado mientras na nakatalaan na nindang isangat an casong multiple murder sa kaggibo kan krimen.

An mga biktima iyo sinda Rodelo Pagtolon-an, Nathaniel Pagtolon-an Orlando Balabad asin an esposa kaini na si Chuchi Balabad y Pagtolon-an.

Sinabi kan jefe de pulicia sa saindang imbestigasyon nagluluwas na ‘’ingit’’ sa negosyo an motibo.

An mga biktima mantang nag-aaratubang sa lamesa sa Chuchi’s Kambingan sa barangay Fabrica, pinauranan nin bala kan calibre 45 asin 9mm na pistola na dai nahaloy binawian nin buhay kan idalagan pa sa hospital.