SLF magiging operational na

Marerealisar man giraray sa bagong administrasyon kan City Hall an operasyon kan sanitary landfill (SLF) asin pigtalaan nang gamiton nganing bagsakan nin basura alagad magkakaigwa muna nin simpleng seremonya na gigibohon sa Agosto 14 sa barangay San Isidro na magiging bisita si Bise Presidente Leni Robredo.

Kinumfirmar ni Alcalde Nelson Legacion na bubukasan na an SLF alagad an uusaron muna an cinco mil metros cuadrado asin antes matapos an huring semana kan Agosto magiging nang 10,000 metros cuadrado.

An SLF, saro sa mga programa na pigpangako ni Legacion na tatawan nin prioridad sa laog nin sangatos diyas niya sa puesto sa City Hall nganing maging operational asin sasarahan na an 60 años na Balatas dumpsite.

Si Engr. Joel Martin, jefe kan Solid Waste Management Office nagsabi an 90 toneladang basura na saindang nakokolecta aroaldaw deretso na sa SLF asin mantang sasarahan na ninda an Balatas dumpsite. An proyecto tinugotan kan City Hall na i-extendir an patrabajo hasta kan Febrero 26, 2018 alagad dai nangyari.

Kan magtukaw si Legacion bilang jefe ejecutivo, nag-isyu nin memorandum sa R.A. Mendiola Construction and Developer na dapat magpaliwanag kun tano ta grabe an slippage na inabot nan in 39 por ciento.

Bakong makatutubod an paliwanag kan kontraktor na pigdahilan an mga pag-uran kaya dagos nang pig-terminate alagad dai man naka-ulang nganing maging operational an SLF ngonian na Agosto. (dpa)