Bimbo Construction bawal na magparticipar sa subasta

Road widening project sa barangay San Felipe, Ciudad nin Naga.

Binawalan na kan Department of Public Works and Highways (DPWH) asin kan Office of the Presidential Assistant for Bicol Affairs (OPABA) an sarong construction firm sa Ciudad nin Naga na magparticipar sa ano man na public bidding sa mga proyecto kan gobierno sagcod na dai natatapos an pig-iimplementar na P45-M na road widening project sa brgy. San Felipe.

Si Usec Marvel Clavecilla kan OPABA nagkumfirmar sa Bicol Mail na nagdecisyon an saindang ahencia asin kan DPWH Bicol sa pamamayo ni Regional Director Virgillio Eduarte na iimponer na an penalidad na dai tugotan na makaparticipar sa arin man na subasta sa proyecto kan gobierno an Bimbo Construction and Supply na sadiri ni Bimbo De Leon.

An kontratista iyo an nakakua kan kontrata sa DPWH kan 1,100 metros na laba kan road widening project sa barangay San Felipe, Ciudad nin Naga sa dahilan na inabot na sa treinta y dos (32) por ciento an slippage na dapat natapos kan Noviembre 2018.

Alagad an saro sa pigdadahilan inabot nin abala an proyecto matapos suspendiron an patrabajo kan Oktubre 26 huli kan temporary environmental protection order (TEPO) kan corte.

Igwang mga lugar na dapat ipadagos an patrabajo alagad grabe na an pagkaabala mientras na may minsan mayong patrabajo an construction firm sagcod na inabot na nin 32 por cientong negative slippage.

Base sa Acta Republica 9184 o mas midbid sa apod na Government Procurement Act kun an sarong proyecto inabot na nin 15 por ciento pataas an negative slippage, puede nang i-terminate an kontrata.

Dai ma-terminate an kontrata huli ta saro sa dahilan iyo an dai maputol an mga puon nin kahoy sa gilid nin tinampo mientras nagdadanay pa an TEPO.

Naging controversiyal an proyecto kan Bimbo Construction sa mga pagtuyaw kan publiko asin kan motorista sagcod na nagiging gurobot an bulos kan trafico na nagiging dahilan nin pagkahuri sa klase kan mga estudiantes asin man empleados kan gobierno asin sa pribadong sektor.