Dugang na bed capacity sa BMC, aprobado na

Aprobado na sa Committee on Health sa Camara-Baja an house bill para sa dugang na bed capacity asin upgrading kan Bicol Medical Center na piglalaoman antes matapos an taon 2019 makakalusot sa 18th Congress mientras na nagkapera nang nasa mayoria an nagpahayag nin suporta sa propuestong ley na pinapadrenohan ni Congresista Gabriel H. Bordado Jr.

Enot nang na-aprobaran kan 17th Congress sagcod na dai na nag-agi sa halawig na mga proceso sa committee hearing mientras na suportado ini kan Department of Health asin kan mga opisyales kan BMC sa pamamayo ngonian ni OIC Medical Director Francisco Sales.

An bill gigibohon nang 1,500 an bed capacity hali sa dating 500 asin kabali na an upgrading kan mga service facilities, medical equipment, dugang na nurses asin doctor, sabi ni Bordado kan mag-atubang sa press conference.

Saiyang pigbuyagyag naheling niya an kamugtakan kan pasyente na surok-sukon na sa katre sagcod na saiyang napag-araman inaabot nin 800 hasta 900 pasyente an naglalaog aroaldaw.

Igwa nang bagong mga edificio an BMC asin maninigo lang an dugang na bed capacity sagcod na pakarhayon an mga facilidades nganing dakul na mga pasyente an matabangan.

An bill na-aprobaran na kan 17th Congress asin tolos pigsunad sa senado alagad tinikapo na sa panahon sagcod na nagsara an huring session.

Huli kaini, liwat niyang pigre-file sa pagbukas kan 18th Congress asin kun isakat sa senado papangenutan ninda Senador Richard Gordon asin Bong Go nganing tarabangan na makapasar tolos asin maaprobaran ni Presidente Rodrigo Duterte.

Si Presidential Adviser Marvel Clavecilla nagsabi na dakulang bagay kun makalusot na an bill ni Bordado mantang an saiyang kamawotan sa pagpakarhay kan operasyon kan BMC sa paagi kan dugang na facilidades huli ta padagos na naghibibog an mga dinadarang pasytente digdi aroaldaw. (dpa)