Encuentro sa Caramoan bakong drama - 9th ID

Nanindugan an 9th Infantry Division kan Philippine Army sa Bicol na may base sa Camp Elias Angeles, Pili, Camarines Sur na lihitimo an nangyaring encuentro sa pag-ultanan kan mga soldados kan gobierno asin rebeldeng NPA sa barangay Lidong, Caramoan, Camarines Sur kan Agosto 13.

Igwang sertipisyaon an Barangay Council kan Lidong na nagpapatunay na igwang nangyaring barakbakan kan mga rebelde asin militar asin igwa pang reinforcement nin duwang helicopter hali sa Philippine Airforce na iyo man an nagpapa-uran nin bala sa mga kalaban kan gobierno.

Ini an mga pahayag sa Bicol Mail ni Army Major Ricky Aguilar kasunod kan pinaluwas na press statement kan Tomas Pilapil Command na nagsisikwal kan pinaluwas na report kan militar sa media na igwang nangyaring encuentro kan Agosto 13 na nasabat kan tropa kan gobierno an maabot sa 80 mga NPA.

Afuera kaini, sa ginibong Fact Finding Mission kan Agosto 15 kan Karapatan Bikol asin Bayan Camarines Sur nagkua nin mga testimonia sa mga residentes kan barangay na nagpapaliwanag na mayo mang nangyaring maabot sa duwang oras na encuentro sa saindang lugar.

Sinabi ni Nelsy Rodriguez sa entrevista kan BM na sinda na mismo an nagdirektang magkua kan mga pahayag kan residentes huli ta iyo an nagsasabing totoo.

Maabot sa veinteng residentes asin si Barangay Kapitan Ruel Gasga an saindang nakaulay na nagsasabi na mayong na-aaraman na nagkaigwang encuentro kan Agosto 13. Sinabi ninda na mga ala 1:30 nin hapon nagpapa-uran na nin mga bala an duwang helicopter apesar na mayo man nin kalaban na nagresulta sa pagkatakot kan mga residentes mala ngani igwang mga nag-evacuar na residentes kan Lidong.

Bakong makatutubod an report kan militar na igwang 80 mga rebelde an saindang na-encuentro alagad mayo man tinamaan nin bala buot sabihon mayong katutuanan an nangyaring encuentro, sabi pa.

Sa text message ni Major Aguilar, sinabi kaini na ‘’May certification tayo mismo galing sa brgy. na nagpapatunay na legitimate encounter ang nangyari sa Lidong, Caramoan, CamSur. Fact finding ba ang ginagawa ng Bayan at Karapatan o propaganda production lamang? An NPA ang ugat ng kaguluhan sa isang lugar.

An kanilang pangingikil sa mga kababayan ang mas lalo pang nagpapalugmok sa kanilang katayuan sa buhay. Bakit di nila kondenahin ang gawaing ito ng mga teroristang NPA? Bakit di nila ipanawagan na itigil na ng mga NPA ang pangingikil? Bakit di nila himukin ang mga armadong NPA na umalis na dito sa Bikol’’. Alagad an FFM, sinabi pa na apektado kan pagpakawala nin mga bala kan duwang helicopter an abot sa 200 katawo hali sa Sitio Kamansi, Brgy. Toytoy, Garchitorena, CamSur na kataid na barangay kan Lidong.

Sinda napiritan na magdurolag pasiring sa covered court sa Garchitorena na tolos man nagpadara nin ayuda si Caramoan Mayor Marilyn Co asin Kapitan Gasga. (dpa)