Naga babahaon nin int’l beauty queen


PRESS CONFERENCE. Si dating Vocal Carlo Batalla (nakatindog) nagpapaliwanag sa miembros kan media kun panong napili an Ciudad nin Naga bilang presentador kan Miss Earth 2019 na gigibohon sa Oktubre 26. Sa too niya sinda Alcalde Nelson Legacion, Kgd. Jose Perez asin Kgd. Sonny Rañola asin sa wala sinda Architect Louie Domalaon asin Atty. Luisito Tongson Jr. kan UAP-Manila Archizonian Chapter. (dpa)



Marerealisar tolos an saro sa mga programa kan Ciudad nin Naga sa executive legislative agenda na dapat cada taon igwang sarong international event asin an pinakaenot iyo an nakatalaan na Miss Earth 2019 sa Oktubre 26 na paparticiparan nin noventa y tres (93) na mga candidata hale sa manlaen-laen na nasyones.


Ginibo na kasoodmang aga sa City Hall an Signing of Memorandum of Agreement ninda Alcalde Nelson Legacion asin kan Team Batalla na pinangenotan ni dating Vocal Carlo Batalla na iyo an franchise holder kan Miss Earth 2019.

An international event dakulang bagay sa programa sa turismo kan ciudad maging sa lado nin economiya. An napiling lugar kan Coronation Nights iyo an Jesse M. Robredo Coliseum na kayang makaakumodar nin doce mil (12,000) na madalagan kan programa.

Sa press conference, kaibahan sa Team Batalla sinda Architect Louie Domalaon asin Atty. Luisito Tongson Jr. kan UAP-Manila Archizonian Chapter asin sa lado kan City Hall sinda Alcalde Legacion Consejal Jose Perez asin Sonny Rañola.

Sinabi ni Batalla napili ninda an Ciudad nin Naga na maging venue kan Coronation Night kan Miss Earth International 2019 digdi sa Bicol huli ta sa saindang ginibong drone shot kan JMR Coliseum magayon an view asin pang international standard.

Afuera kaini, iyo an pinakadakula sa Southern Luzon na igwang 12,000 sitting capacity.

Alagad saiyang piglinaw na bako lang sa Ciudad nin Naga, magkakaigwa man sinda nin ibang mga actividades kan mga candidata sa Ciudad nin Legazpi asin iba pang mga lugar sa Kabikolan.

An ibang mga beauty queen enot nang pigdara kan Team Batalla sa Pili, Tigaon asin Sipocot, gabos digdi sa Camarines Sur.

Maarabotan an magagayon na daraga pakatapos kan mga actividades sa Peñafrancia fiesta sa masunod na bulan nin Septiembre 2019.

Sa lado kan City Hall, pigcierto ni Alcalde Legacion na saindang papakarhayon an JMR Coliseum nganing maging presentable sa turista sa luwas asin sa laog kan edificio asin gigibohon pang international standard.

Sa Agosto 23, nagtalaan nin miting an jefe ejecutivo sa Philippine National Police asin iba pang mga ahencia nganing maseguro an paz y orden arog kan mga pag-andam sa seguridad kun panahon nin Peñafrancia fiesta. Ini afuera kan hinagad na augmentation force kan Team Batalla sa Phippine Army asin PNP.

An bagong administrasyon kan ciudad saro sa programa iyo an pagkaigwa nin mga mini forest saen man na lugar kan mga public places asin sa launching activities sa enot na semana kan Oktubre 2019 an mga beauty queen nakataan magparticipar. (DPAureus)