NCRC pigbilog kan City Hall

Sa kamawotan na matawan nin mas konkretong lakdang an pag-otob sa pigmamawot na magin sarong preparado, masarig asin may pagmakulog na lugar an ciudad nin Naga, binilog ni Alkalde Nelson Legacion an Naga City Resilience Council (NCRC).

An NCRC, segun sa orden ehekutibo na ipinaluwas kan alkalde, igwa nin mandato na magkonducir nin mga pag-adal dapit sa sitwasyon na dara kan maraot na kalamidad kaibahan na an paghaman nin mga paagi tanganing malikayan o mabawasan an maraot na epekto kan ano man na trahedyang dara kan panahon o gibo nin tao.

Mandato pa kan pigbilog na grupo na kompuesto nin mga representantes gikan sa pribadong sektor asin personahes kan city hall na siertohon na padagos na maitolod nin husay an mga planong madara nin karahayan sa ciudad tanganing makamtan kan Nagueño an marhay na pagbuhay.

An NCRC papamayuhan ni Alkalde Legacion bilang chairperson, PSO executive director Renne Gumba bilang co-chairperson asin mga pamayo kan CDRRMO, CSWDO, ACTO, ESSO, Metro PESO, Naga City Investment Board, GSO, Treasurer’s Office, Bicol Central Station, CPDO, CEPPIO, CHO, ENRO, CEO, Housing Settlements and Dev’t Office, asin SWMO.

Kaibahan pa man an mga representantes hale sa Naga City People’s Council, SM City Naga, Ateneo de Naga University, MNCCI, NCF, UNC, Rotary Club of Naga East, CSNHS, Bicol Habitat for Humanity, LYRR Realty Development Corp., Casureco II, MNWD, DILG, DPWH, PENRO, DTI, asin PIA. (Jason Neola)