Barangay, SK elections segurado nang i-uuktaba

Haros naseseguro nang ma-uuktaba an pigtalaan kan Commission on Election (Comelec) na Barangay asin Sangguniang Kabataan elections sa Oktubre 2022 envez kan Mayo 2020.

Suportado ni Congresista Gabriel H. Bordado Jr. kan tercer distrito kan Camarines Sur an propuestong ley sa congreso huli ta an mga elihidong opisyales de barangay asin SK igwa sanang duwang taon asin kulang an terminong ini kun madagos an nakatalaan na eleksyon sa 2020.

Si Bordado, nagplantiar nin Barangay Reform Bill na enot na niyang pig-file kan 17th Congress alagad ipapadagos niya giraray ngonian na 18th Congress nganing ma-aprobaran na an mayor na katuyohan kaini para sa dugang na insentibo kan mga opisyales de barangay.

Apat nang mga congresista an nagplantiar kan kaparejong bill asin kabali si Bordado sa nagsusuporta mientras na dakul nang lehislador an nagpahayag na maninigo sanang i-uktaba an eleksyon sa Oktubre 2022.

Afuera sa Camara-Baja si Senador Bong Go iyo man an nangenotan sa pag-file kan bill sa pag-uktaba kan barangay asin SK election sa 2022.

Sa Commission on Election magpapadagos kan saindang voters registration bilang pag-andam sa barangay elections alagad kun igwa nang ley na i-uktaba an eleksyon mayo sindang magiginibo magsunod sa ley, sabi ni Alexander Marpuri an opisyal na parataram kan Comelec Camarines Sur. (dpa)