Casong dengue sa Naga naglangkaw 108%

Palaog na sa mga bulan nin ‘’ber’’ panahon nin tig-uran, alagad padagos naglalangkaw an casong dengue sa viente sieteng barangay asin duwa na an binawian na parejong babae na nag-eedad nin 27 años sa brgy. Pacol asin 74 años sa brgy. Abella.

Si Consejal Sonny Rañola, pamayo kan Committee on Health sa saiyang privilege speech sa sesyon regular kan Sangguniang Panlungsod nagpahayag na puon kan Enero 1 hasta Agosto 22, 2019 nagsakat na sa 380 an caso asin posibleng maglangkaw pa mientras na panahon na nin tig-uran.

Naglangkaw nin 108 por ciento kumpara sa kaparejong peryodo kan taon 2018.

Sa viente sieteng barangay an limang nangengenotan iyo an mga barangay kan Pacol na igwang 50 caso asin saro na an binawian nin buhay, brgy. Concepcion Pequeno – 40 caso, Cararayan – 35, San Felipe – 31, Carolina asin Mabulo parejong igwa nang tig-a 21 caso.

‘’Alarming’’ na an dengue mantang labi na sa doble an caso kumpara kan nagtalikod na taon.

Tanganing paurogon an campaña laban sa dengue, pinangenotan ni Rañola an pagpasar nin P700 mil na appropriation ordinance asin sinuportaran kan gabos na miembros kan Sangguniang Panlungsod mientras na saro sa pighurot ni Alcalde Nelson Legacion na kaipuhan an fondo kasunod kan pinaluwas na Executive Order 2019-038 na nagbibilog kan Naga City Anti-Dengue Task Force.

An fondo para sa mga gigibohon na fogging operations sa mga barangay, suporta sa implementasyon kan ‘4S strategy’’ bulong asin iba pang paagi sa pagsugpo laban sa mosquito-borne disease.

An EO 2019-038 nganing maghimo nin mga programa an mga barangay council para mag-organisar kan saindang kanya-kanyang anti-dengue task force na maserbe na kaipuhan an mga kagharong maggibo nin preventive action contra sa paglakop kan dengue.

An aksyon na ini kan City Hall kasimbagan sa declarasyon kan Departamento de Salud (DOH) sa national dengue epidemic. (DPAureus)