ISYU SA RICE TARRIFICATION LAW: Reclamo kan mga paraoma inatubang na sa senado


Paraoma gamit na an makina sa pag-ani nin paroy alagad nalulugi nin huli kan baratong presyo sa mga kumprada. (Retrato kua kan DA Bicol)



Inatubang na kan Committee on Agriculture sa senado an reclamo kan sektor nin paraoma sa padagos na paghuros kan presyo nin paroy kasunod kan pag-epekto kan Rice Tarrification Law (RTL) envez an napaboran an mga pribadong negosyante.

An komite pinamamayohan ni Senador Cynthia Villar na pigdangog an inagrangay kan paraoma na bakong nakatabang an RTL sa saindang sektor envez iyo nalulugi. An mga senador na presente asin miembros kan komite sinda Riza Honteviros, Nancy Binay asin Imee Marcos.

Si Silvestre Bonto, presidente kan National Confederation of Irrigators Association (NCIA) nagsabi an committee hearing ginibo kasoodmang Miercules, Agosto 28 asin ipapadagos pa sa Septiembre 3, 2019.

Pinahayag kaini sa Bicol Mail na hinagad ninda an solusyon sa problema sa padagos na pagbagsak kan presyo na saro sa kaipuhan iyo an direct subsidy sa irrigators association, matawan nin mechanical dryers, tractors asin iba pang makinarya nganing magbaba an production cost sa gastos sa pag-oma asin iba pang subsidia para sa abuno asin banhi.

Grabe an gastos sa pag-oma alagad nagpaparababa an presyo sagcod na naresulta na madisganar na ipadagos an saindang pagtanum nin paroy, sabi pa ni Bonto.

Digdi sa rehiyon Bicol an presyo kan paroy nagdadalagan na sa P12 hasta P13 cada kilo alagad kun ipapabakal sa National Food Authority (NFA) halangkaw man kuta an presyo sa cantidad na P17 alagad kaipuhan pang alangon muna an bagong ani, an solusyon digdi an mechanical dryer.

Hali sa dating P14 hasta P15 cada kilo kun panahon pa nin aranihan nagiging opurtinista pa an mga kumprador binabagsak an presyo.

Nag-epekto an implementing rules and regulation (IRR) kan RTL kan Abril 29, 2019 digdi na nagpapaabot nin mga reclamo an sektor nin paraoma asin kabale sa apektado man iyo an NFA mientras na dakul an mawawarang nin trabajo.

Pigcierto kan komite na matatabangan man giraray an paraoma mientras na igwang alokasyon na P10 bilyon an gobierno para sa Annual Rice Competitive Enhancement Fund na yaon sa poder kan Departamento de Agricultura an pagpaluwas kan fondo.

An P5 bilyon para sa Philmech na gagamiton para sa production of postharvest machineries and small irrigation projects, mientras na P3 bilyon para sa Philrice, P1 bilyon itatao sa DBP sa easy access loan asin P1 bilyon para sa iba pang actividades na an setenta por ciento kaini sa TESDA. (DPA)