DA mapautang P15 mil na mayong interes

Pili, Camarines Sur – Puponan na kan Department of Agriculture (DA) sa Bicol an pagtaong P15 mil na asistensya sa mga paraoma na apektado kan padagos na pagbaba sa presyo kan paroy huli kan Rice Tarrification law (RTL) alagad an proceso maagi sa bangko.

An DA sa paagi ni Sekretaryo William Dar asin Land Bank of the Philippines (LBP) nagkaigwa na nin signing of memorandum of agreement sa pagpaluwas nin fondo sa paagi kan SURE Aid programa kan ahencia sa mga paraoma parte kan pigmamando kan RTL.

Si Emily Bordado, regional spokesperson kan DA Bicol nagpahayag sa Bicol Mail na an kinse mil pesos ipapautang sa calificadong mga paraoma na igwang sarong hektarya asin pababa.

Magian an pautang kan DA huli ta mayong ipapatong na interes o por ciento cada bulan na dapat mabayadan sa laog nin kinseng taon.

Pighahalat na kan ahencia an guidelines hali sa saindang central office alagad an kabali sa mga rekisitos sa ma-aprobetsar kan programa sa pagpa-utang iyo an certificasyon kan Municipal Agriculturist Officer (MAO) na igwang pig-ooma an aplikante.

Sinabi pa na igwa nang master list an DA Bicol kan mga calificadong paraoma na puedeng matawan nin asistensya huli sa epekto sa presyo kan paroy.

Pigtawan muna nin prioridad an mga provincia digdi sa rehiyon cinco na halangkaw an produksyon nin paroy na kinababalihan kan Camarines Sur, Albay, Sorsogon asin Masbate asin dai pa kabali an Camarines Norte asin Catanduanes. (DPAureus)