Rice Tarrification law daing pakinabang

Nagkuriyat na sa mga mercado publiko an mga imported rice alagad dai man nangyari si katuyohan kan Rice Tarrification Law (RTL) na mababa an presyo kan commercial rice.

Katuyohan kan RTL nganing makabakal nin baratong presyo kan bagas an mga consumedores dai man ini nangyayari sagcod na apektado nang marhay an mga paraoma nin huli kan padagos na pagbaba kan presyo kan paroy.

Ini an tuyaw ni Ms. Tess Cielo, pamayo kan Amihan Kababaihan Magsasaka sarong organisasyon nin mga paraoma sa Camarines Sur na nagrereklamo na nin pagkalugi sa pag-oma kasunod kan padagos na pagbagsak kan presyo kan paroy sa mga kumprada.

Maging an consumedores kan commercial rice nagsabi na nakakabakal na sinda kan mga imported rice alagad halangkaw man giraray an presyo.

Sa survey sa mga mercado kan grupo ni Cielo, sinabi kaini na dai man na-realisar an pagbaba kan presyo kan mga imported rice mala ngani an dalagan kan presyo cada kilo nagcacantidad nin P45 hasta P50.

Sa kilo kan paroy envez na maglangkaw alagad nagbaba na sagcod sa P10, kun arog kaini magtitios an paraoma sagcod na magpundo na kan saindang pagtanum paroy, sabi pa.

Susog sa ley an rice traders iyo na an maangkat kan imported rice tanganing magkaigwa nin competisyon sagcod na magbaba an presyo.

Dai man ini nangyayari envez nagkakaigwa man giraray nin rice cartel.

Hinagad kan organisyon nin mga paraoma na dapat ibasura na kan congreso an Rice Tarrification law.

Limitado na an pigsusuplay kan NFA rice sa mga mercado na haros dai na nakakabakal an pobreng consumedores, sabi pa ni Cielo.