“Lakbay-Dalangin” kan paraoma ginibo vs Rice Tarrification law

‘’Lakbay-Dalangin ng mamamayan’’ dara an Inay Maria ng Magnificat, patrona nin mga paraoma asin an imahen ni Nuestra Senora de Penafrancia na nagpapamibi asin naghahagad nin justicia sa padagos na pagtios huli kan Rice Tarrification law. (J Casilihan)

Maabot sa 700 na mga paraoma asin mga miembros asin lideres kan progresibong grupo sa Camarines Sur na inaapod na Defend Bicol, Stop Attacks Network an nagparticipar sa duwang aldaw na ‘’Lakbay-Dalangin ng mamamayan’’ na nagpuon kan Lunes sa Ciudad nin Iriga sagcod kan Martes na hapon na nagtapos sa paagi kan saindang pag-atendir nin misa sa Peñafrancia Basilica Minore.

Aga, hapon an saindang paglalakbay dara ninda an imahen ni Nuestra Señora de Peñafrancia asin Inay Maria ng Magnificat an patrona nin mga paraoma asin nagpapamibi na nag-aarangay na matawan sinda nin justicia kan gobierno resulta kan pagtios huli kan pagbagsak nin presyo kan paroy epekto kan Rice Tarrification law (RTL).

Ipinahayag ni Nida Barcenas kan Karapatan Bikol na grabe na an nangyayaring injusticia sa mga paraoma na mas pinapatios kan RTL ni Senador Cythia Villar envez an natatabangan iyo an mga higanteng rice traders.

An RTL hinalian nin poder an NFA sa pag-angkat nin bagas alagad tinao na sa mga negosyante kaya sinda an nagpapayaman dai man nangyari si pigsasabi ni Presidente Rodrigo Duterte asin Senador Villar na mababa an presyo kan commercial rice.

Saindang pigtutuyaw an RA 11203, na Rice Comprehensiveness Enhancement Fund na P1 bilyon na fondo na ipapautang sa mga paraoma na mayo mang narerealisar.

Kabali pa sa saindang isyu contra sa administrasyon Duterte iyo an Memorandum Order No. 32 na nagbugtak sa Negros, Samar asin Bicol sa State of National Emergency nganing matawan nin dahilan para sa troop deployment na ngonian pigrereklamo na an mga soldados na naglalangkaw an mga sombong sa harassment asin pagbalga sa deretso humano.