Sal Panelo
1964 kan bukasan asin inaguraran an Holy Rosary Major Seminary sa Concepcion kan mabisto ko an solterong matinis an boses na kataid ko sa tukawan habang nagsususurat kami nin rawit-dawit sa English sa sarong poetry writing contest na pinadrenohan kan Archdiocese of Caceres katakod kan engrandeng okasyon.
Third year high school ako representante kan Ateneo de Naga, an kataid ko palan na nagpabisto na si Sal Panelo, college student kan University of Nueva Caceres na iyo man an representate kan eskwelahan sa parehong kompetisyon. Dakol kami kadto haros pano an sarong kwarto nin mga parasurat na hale sa man iba-ibang eskwelahan sa Naga arog kan Colegio de Sta. Isabel, Naga College, Camarines Sur Agricultural School, Camarines Sur College of Arts and Trades asin iba pa. May mga harale sa Partido asin Rinconada. Nagkataon na kaming magkataid ni Sal saka ako an nanggana sa high school category asin college category. Magpoon kadto nagkabarkada na kaming duwa.
Kan college yaon ako sa U.P. Los Banos, siya man sa U.P. College of Law sa Diliman, Quezon City.
Medyo halawig na panahaon dai kami nagkahelingan. Alagad kan ako mag-eskwela sa UNC asin naguin aktibista asin campus journalist, si Sal na estudyante para abogasiya sa U.P. Perming nag-uuli sa Naga bilang aktibista asin miyembro kan Kabataang Makabayan (KM). Kairiba niya kadto sa Louie Ortega,Jesus Villaseñor asin Raquel General na mga aktibista man. Ako nagbale sa Khi Rho movement na pig-babansagan clerico fascist na dukot sa Simbahang Catoliko.
An duwang grupo parehas anti-Marcos antes kan Martial Law. Si Sal nababasa ko sa mga periodiko national arog kan Manila Times na imbueltong marhay sa aktibismo sa U.P. asin Metro Manila.
Kami man digdi sa Naga (Bikol) may suhay man na aktibidades bilang mga aktibista. Kairibanan ko kadto si Alex Abad, Roger Tormes, Alfonso Llaguno, Ruben Santiago, Jose Camano, Mario Ochoa, Francia Reyna, Eddie Imperial, Orly Olavere, Jorge Dumaguin, Delia Esguera, Zenaida Najera, Nardito Gonowon asin kadakol pang iba na ipinaglalaban an hababang babayaran na matrikula sa pag-eskwela.
Nagmamartsa kami bilang protesta sa palibot kan Naga. Sa laog ni duwang taon sa anibersaryo kan pagkapundar kan UNC binabagatan mi nin lungon o kabaong an gate kan UNC tangarig dai makaralaog an mga eskwela asin empleyado/empleyadas.
Pati an arkila sa MITRA o daga kan simbahan sa Francia pinakiaraman mi pa. Pinirit ming iluwas kan Palasyo an accounting kan kuwartang bayad sa arkila sa daga kan Simbahan sa kalabaan kan Peñafrancia Avenue.
Nagtatabang man samo an grupo ni Sal Panelo pero siya perming nakasulot nin Maoist outfit saka Maoist Pins asin nakagugum an kamaoo bilang sinyal nin pagprotesta o laban.
Mga apat o limang taon na medyo maribok an buhay kan mga estudyantes sa Naga, mainit na an militar sainda. Kan magbaba an Martial Law kan Setyembre 21, 1972 dakul an nagkawarara sa Naga, an iba nagsarakat sa bukid, an iba nagsumpa sa Bagong Lipunan, an iba lakaw-lakaw sana garo mayong nangyari. Nagkahelingan liwat kami ni Sal Panelo kan siya abogado na, ako politiko asin broadcaster/periodista, nagkakarape-kape kami sa restoran asin nag-oorolay olay dapit sa mainit na isyus kan panahon.
Si Sal Panelo bistong taga-Naga ta an ina niya San Buenaventura pinsan ni depuntong Atty. Rene Rañeses asin sobreno ni Mrs. Carmen San Buenaventura Guevara an may saderi kan Carmen Hotel sa Naga asin agom kadtong depuntong industriyalista Domingo Guevara.
Kan ako maguin program host kan “Ini an Totoo sa GNN 48” sa likod kan PNB (sa laog nin 6 na taon) pirme kong bisita si Atty. Panelo. Pigdidiskutir niya an saiyang mga kaso sa Manila bilang celebrity lawyer kan mga artista asin pamusong tao. Sarong beses pigbuyagyag niya na siya an abogado ni Nur Misuari na dakul pang armadong tauhan duman sa Mindanao. Kan karampanyahan kan 2016 duwang beses siya magkampanya sa programa ko na iboto si Davao Mayor Rudrigo Duterte para Presidente kan Pilipinas.
Kan magbisita sa Naga para sa” Listening Tour” si Duterte, si Sal saka si Judge Marvel Clavecilla an nagpreparar kan okasyon. Si Louie Ortega an nagpaimprinta nin dakol na T-shirts na “Run Duterte Run”. Ipinabisto niya ako sa kandidato bilang katabang sa propaganda.
An namalisyahan ko kadto bakong harani si Sal Panelo ki Dante Jimenez kan Mariners Polytechnique Colleges Foundation na saro man na lider ni Duterte.
Kan manggana na si Duterte bilang bagong Presidente kan Pilipinas sangli ki Noynoy Aquino nag-apod tulos sako si Sal Panelo na mapa-interview. Siya na an Presidential Spokesman kadto pero an sabi niya bako akong employment agency. An boot sabihon dai mag-apply saiya nin anuman na trabaho sa gobyerno.
Inimbitaran ko siya komo ako an vice-chairman kan KBP-Community Advisory Board sa Camarines Sur na maguin guest speaker/ inducting officer kan 2016. Si Romar Vasquez an president kan KBP, si Robert Obiedo an chairman kan CAB. Ako pa an nag-introducer saiya sa publiko sa okasyon na ginibo sa Villa Caceres Hotel digdi sa Naga. Poon kadto sagkod ngonyan dai na kami nagkahelingan. Sabi kan best friend niya asin personal driver na si Louie Ortega, garo ngaya nalingaw na satuya si Sal Panelo.
***** Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Ervin Borja and Ernie Verdadero.
May mga espesyal na bisita.
Diyos mabalos.
For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero Website: www.bicolmail.net