Bicol salbado sa ASF-DA

Pili, Camarines Sur – Nagkaperang mga putahe nin karning orig, kabali na an masiram na lechon pigsarama-samaan sa ginibong ‘’boodle fight’’ na pinangenotan ni OIC Regional Executive Director Rodel P. Tornilla kan Departamento de Agricultura asin iba pang mga swine industry stakeholders nganing ipaheling ninda sa publiko na an rehiyon Bicol salbado sa African Swine Fever (ASF).

Pig-asegurar ni Tornilla an mga consumedores na mayong peligro sa ASF an rehiyon Bicol mientras na padagos na nagiging estricto sa pagbantay sa mga karnihan sa mercado an National Meat Inspection Services nganing maseguro kan publiko an kalinigan kan mga pinapabakal na karning orig.

Kabali sa nagparticipar sa pangudtohan kan Lunes, Septiembre 16 na ginibo sa opisina rehiyonal kan DA Bicol iyo an mga DA attached agencies siring kan National Meat Inspection Services asin an Bureau of Animal Industry (BAI) Veterinary Quarantine Services, presente sa ‘’boodle fight’’ asin nakisabay sa pangudtohan iyo an pamayo kan Provincial Agriculture Office sa Camarines Sur, Phil. Information Agency, asin Camarines Sur Chamber of Commerce and Industry, Private feed millers, miembros kan media asin empleados kan DA. An Univet Nutrition and Animal Healthcare Co. (UNAHCO iyo an nagpadreno kan boodle fight.

An DA padagos an saindang coordinasyon sa mga attached agencies asin LGUs, pribadong sektor asin industry stakeholders asin naghimo na nin mga lakdang tanganing maprotehiran an rehiyon contra sa ASF.

Nag-apelo an ahencia sa publiko na ano man na insidente nin helang sa hayop dapat ipaabot tolos sa saindang mga respektibong municipsyo, ciudad asin sa provincial veterinary offices. (DPA)