P15K na ipapautang bakong solusyon sa reclamo vs RTL

Bakong solusyon an pagpautang nin P15mil envez tunawon na an Rice Tarrification Law (RTL), ini an solusyon sa padagos na pagbagsak kan presyo kan paroy sagcod na padagos nalulugi an mga paraoma.

Ini an kahagadan kan sektor nin paraoma sa Camarines Sur nin huli ta dawa pautangon pa kan Departamento de Agricultura kan P15mil para sa cada hektaryang oomahon kulang pang marhay sa ginagastos na P40mil.

Sinda Bert Author, presidente kan Kilusang Mambubukid asin Tess Cielo lider kan Amihan Kababaihan Magsasaka parejong organisasyon nin paraoma sa Camarines Sur nagpahayag na pigbubulong sana kan gobierno an kaangutan kan mga paraoma sa sinasapong pagkalugi sa baratong presyo kan paroy epekto kan RTL.

Saindang kinukundenar an RTL na puon sanang iimplementar kan Abril 2019 alagad luway-luway nang ginagadan an mga paraoma mientras na tinatawan sana nin pabor digdi iyo an rice traders na dati nang milyonaryo.

Base sa RTL hinali na sa National Food Authority (NFA) an pag-angkat nin imported rice asin ipinasa na sa darakulang rice traders sa katuyohan kan gobierno na mababa an presyo kan commercial rice huli sa competencia.

Dai man nangyari mala ngani an halangkaw na presyo kan bagas sa mga mercado nagdadanay man giraray, sabi pa ninda Cielo asin Author.

Ipinahayag pa ninda na bakong garantiya na an pagpautang nin P15mil kan gobierno makakatabang sa pagbagsak kan presyo kan paroy an solusyon digdi dapat mag-aksyon an gobierno na enmienda o kun dai man dagos nang ibasura.

Pigpangako ni Secretaryo Willian Dar na sa mga masunod na bulan matatawan nang solusyon an reclamo kan sektor nin paraoma mantang igwang P10 bilyon na fondo an Departamento de Agricultura na itatabang sa paraoma nganing mas mapalangkaw an saindang produksyon nin paroy.

Sainda man tinuyaw an mga pahayag ni Senador Cythia Villar, pamayo kan Agriculture Committee sa Senado na mantenido pa sa P17 cada kilo an presyo kan paroy.

Kaputikan ini dai man siya naglilibot sa provincia mala ngani digdi sa Camarines Sur nagdadalagan na an presyo sa P11 hasta 12 pesos asin an abiso kan mga kumprador posibleng magbaba sagcod sa P8 an kilo.

Disganado sinda ki Villar na envez makatabang sa sainda iyo pa an nagpapasakit na posibleng magpundo na sinda sa pagtanum nin paroy kun padagos na malulugi man sana. (dpa)