Pagbaha kan NFA rice sa mercado, imposible
Pili, Camarines Sur. Dai mangyayari an plano kan administrasyon Duterte na dapat bahaon nin suplay nin bagas kan National Food Authority an mercado nganing makompentensiya an presyo kan imported rice huli ta kulang na an nagbabakal kan NFA rice.
Alagad sainda nang pig-iimplementar na magbakal kan paroy kan mga paraoma sa presyong P19 cada kilo.Nagkapera nang mga acredidatong NFA rice retailers an nagsasayuma nang dugangan an saindang suplay nin bagas cada semana sa dahilan na kulang na consumedores na nagbabakal kan saindang baratong presyong bagas.Plano kan NFA Camarines Sur na ipaubos an saindang 50 mil na sakong stock nin imported rice antes matapos an bulan nin Deciembre 2019 alagad dai mapapadali na maubos huli ta kulang na an naghahanap na consumedores kan saindang bagas.Ini an mga pahayag ni NFA Provincial Manager Alan Sabaybay kasunod kan direktiba kan saindang opisina central na dapat dagdagan an saindang pigsusuplay nin bagas nganing magbarato man an presyo kan imported rice.
Segun ki Sabaybay, an ibang NFA rice retailers nagsabi na mas dakul man giraray an nagbabakal na consumedores kan commercial asin imported rice asin kulang na an naghahanap kan bagas kan ahencia.
An bagas kan NFA ipinapabakal sa retailers sa cantidad na P25 cada kilo asin ipapabakal man sa mercado nin P27 na igwang delihencia nin dos pesos sana.
Alagad napag-araman kan Bicol Mail na nangyayari ini huli ta an mga rice retailers pinapautang sainda an bagas kan mga negosyante asin inaabot pa nin cinco pesos an delihencia cada kilo.
Sagcod sa ngonian an presyo kan imported rice nagcacantidad nin P35, P40 sagcod P45 asin masiram pa an namit kumpara sa bagas kan NFA.
An sabi kan gobierno oras na mag-epekto an Rice Tariffication Law ciertong mabarato an presyo kan imported rice alagad dai man nangyayari halangkaw man giraray.
Afuera pa kaini, apektado lugod an mga paraoma huli ta nagparabagsak an presyo kan paroy mala ngani igwa na sanang P10 hasta P11, sabi ni Tess Cielo, an lider kan Amihan Organisasyon ng Kababaihan Magsasaka sa Camarines Sur. (DPAureus)