SA TERCER DISTRITO KAN CSUR: Calabanga iyo an may halabang listahan nin mga infra project

An banwaan nin Calabanga iyo an may halabang listahan nin mga proyecto sa insfrastraktura sa pitong municipyo asin sarong ciudad na sakop kan tercer distrito kan Camarines Sur ni Congresista Gabriel H. Bordado Jr.

Kabaliktaran kan pagtubod kan ibang opisyales lokal kan Calabanga na saindang natutuyawan kun an congresista taga Ciudad nin Naga kadakli kan mga proyecto nadalagan sa ciudad.

Base sa record kan District Office ni Bordado asin sa 3rd Engineering District kan Department of Public Works and Highways (DPWH), nag-aabot sa cuarenta y nieve (49) mga local infrastructure Project (LIP) nagdalagan sa mga barangay kan Calabanga kumpara sa Naga na igwang limang LIP alagad an duwa dai na-iimplementar huli kan kawaran pa nin dokumento kan lote na papatindogan kan covered court.

An ibang consejal kan LGU Calabanga nagsasabi na dapat bangaon na an tercer distrito huli ta kadakli kan mga proyecto nagdadalagan sana sa Ciudad nin Naga mantang si Bordado taga Ciudad nin Naga asin dating opisyal kan City Hall.

Alagad kan maaraman na kabaliktaran an saindang pagtubod, sa pinasaran na resolucion kan Sangguniang Bayan sa ‘’reapportion’’ o propuestong pagbanga kan 3rd congressional district nganing mag-asenso man an mga banwaan kan bagong mumuknaon na distrito.

An mga proyecto kinababalihan nin covered court, patinampo, drainage, multi-purpose bldg. asin iba pa. Dai pa kabali digdi si mga programa sa salud, scholarship asin dakul pang iba.

An mga barangay na may LIP iyo an mga minasunod; Balatasan, Balombon, Balongay, Belen, Bigaas, Binaliw, Binanuaanan Grande asin Pequeno, Bonot Sta. Rosa, Burabod, Cabanbanan, Cagsao, Camuning, Comaguingking, Del Carmen, Dominorog, Fabrica, Harubay, Lapurisima, Lugsad, Manguiring, Pagatpat, Paolbo, Pinada, Punta Tarawal Quinale, Sabang, Salvacion Baybay, San Antonio Poblacion, San Antonio Quipayo, San Bernarnido, San Francisco, San Isidro, San Lucas, San Miguel, San Pablo, San Roque, San Vicente, Siba-o, Sibobo, Sogod, Sta Cruz Quipayo, Sta. Cruz Ratay, Sta. Isabel, Sta. Salud, Sto. Domingo, Sto. Nino Quipayo asin Tomagodtod.

Sa Ciudad nin Naga igwa sa Brgy. Bagumbayan Sur, drainage project (Jacob St.), Carolina, barangay road, Pacol, multi-purpose building (MPB) mantang sa Brgys. Sabang asin Mabolo, pendiente an implementasyon kan MPB huli kan kawaran nin documento sa lote na papatindogan kan MPB.

An iba pang mga banwaan kan distrito iyo an Pili igwa sanang doceng LIP sa 26 na mga barangay; pito sa Ocampo sa 25 barangay; walo sa Canaman sa 24 barangay; pito sa Magarao sa 15 barangay; lima sa Bombon na may walong barangay asin apat sa treceng barangay kan Camaligan.

Sinabi pa an mga proyecto na implementar sa premiro pa sanang termino kan congresista asin magpapadagos sa ika-duwa niyang termino sa iba pang mga barangay na naghahagad nin proyecto sa paagi nin resolucion kan barangay.

Si Bordado, iyo ngonian an Assistant Minority Leader sa 18th Congress na bakong kaalyado kan administrasyon Duterte.