Insurhencia tataposon sa 2022, sabi kan 9th ID
Sa natatada pang tolong taon ni Presidente Rodrigo Duterte sa pagtarabangan kan mga ahencia de gobierno bako lang militar maging sibilyan kayang matapos an problema sa insurhencia sa 2022.
Igwa nang direktiva si Duterte na dapat matapos na an insurgencia sa nasyon sa pagtapos kan saiyang termino.
Ini an mga pahayag sa Bicol Mail ni Major Ricky Aguilar, opisyal na parataram kan 9th Infantry Division kan Philippine Army sa Bicol na may base sa Camp Elias Angeles, Pili, Camarines Sur alagad dakulang bagay kun gabos gigibohon an respektibong trabajo kan kanya-kanyang ahencia de gobierno asin namamanuan puedeng matapos an problemang ini.
Nagtutubod an 9th ID na bako lang obligasyon kan militar marerealisar an target ni Presidente Duterte na taposon an ‘’communist armed conflict’’ asin dakulang bagay an pinaluwas na Executive Order 70 na may titulong: ‘’Institutionalizing the Whole-of-Nation Approach in attaining inclusive and Sustainable Peace, Creating a National Task Force to End Local Communist Armed Conflict’’ na pigpirmahan kan Presidente kan Deciembre 4, 2018.
Dai palang nahahaloy an Department of Interior and Local Government (DILG) sa Bicol sa pamamayo ni Regional Director Anthony Nuyda bilang pamayo kan Localized Peace Engagement, E-CLIP and Amnesty Program-Regional Task Force to End Local Communist Armed Conflict (RTF-ELCAC), pig-miting na an mga ka-partner na ahencias de gobierno para sa saindang kanya-kanyang trabajo para sa localized peace talk asin mga plano tanganing ma-implementar an EO 70.
An campaña laban sa insurhencia suportado man kan Regional Peace and Order Council (RPOC) sa pamamayo ni Alcalde Noel Rosal kan Ciudad nin Legazpi asin nagtutubod an consejo na an pagtapos kan problema sa insurhencia makakatabang sa pagdara kan mga basic services sa mga lugar na pigkukutahan kan rebeldeng grupo.
Sa report kan militar sa RPOC, sinabi ni Rosal sa ngonian igwa pang 277 mga barangay sa Bicol an consideradong lugar kan kumunista asin dakul pang nagtitirios na residentes kan barangay.
Sa datus kan militar an 50 barangay kaini yaon sa Albay, asin ginatos pa nakawarak sa mga provincia kan Camarines Sur, Camarines Norte asin Sorsogon.
Segun sa RPOC an sinambit na mga lugar maninigo lang aboton an saindang comunidad nganing madara sa sainda an serbisyo sa salud, sosyal, programa sa reforma sa daga, patubig kan National Irrigation Administration, tubig inumon asin proyecto sa infrastraktura.
Sinabi pa ni Aguilar na dapat dai lang maglaom sa misyon kan militar alagad an pagtarabangan kan mga ahencia nasyonal, lokal na gobierno asin comunidad makakatabang tanganing taposon an haloy nang problema sa insurhencia.