Propriedad kan gobierno dai salbado sa road clearing operations - DILG
Dai salbado an Barangay Hall in the Sky sa brgy. San Marcos, Camaligan, Camarines Sur sa nationwide road clearing operations na direktiba ni Presidente Rodrigo Duterte sa paagi kan Department of Interior and Local Government (DILG).
Si Secretaryo Eduardo Año, na saro s a mga juespe de honor sa ginibong paglansar kan Naga City Justice Zone kan Septiembre 30 nagpahayag sa miembros kan media na mayong sasantohon an saindang ahencia sa pribado man o sa gobiernong propriedad dapat mayong palibrehon sa road clearing operations.
An plaso sa total demolition kan gabos na ulang na estraktura sa mga tinampo nagtapos na kan Septiembre 29 asin magpapadagos an DILG sa implementasyon kan direktiba ni Duterte.
Dakul pang mga waiting shed sa Camarines Sur an pinalibre kan ibang mga LGUs alagad kun susunodon an orden kan DILG na dawa propriedad kan gobierno na ulang sa tinampo dapat garabaon.
Sinabi pa ni Año sainda nang puponan an validations sa lambang lokal na gobierno kun nasunod an orden kan Presidente alagad kun nagsinutil maatubang nin suspension an alcalde maging an barangay kapitan. Puon kan Lunes, Septiembre 30 liliboton na kan saindang mga opisina lokal kun nasunod an apat na parametro na kinakabalihan kan inbentaryo, kun nagkaigwa nin aktuwal na road clearing, pagbasura kan ordinansa na nagtutugot sa mga pribadong sektor na maokupar an gilid kan tinampo para sa ano man na negosyo asin kun ano an naging aksyon sa mga nawaran nin puesto.
Kun babasehan an orden kan gobierno nasyonal ciertong apektado an 19 años nang barangay hall na yaon sa itaas kan municipal road.
An Brgy. Hall in the Sky na kontruhir kan panahon ni Gobernador Luis Villafuerte kan Camarines Sur asin saro na ngonian na landmark sa banwaan nin Camaligan na magayon an desinyo.
Alagad sinabi man ni Brgy. Kapitan Susan Agna an edificio dai man nakakaulang sa tinampo asin mayo sindang espasyo asin mayong fondo para sa pagbalyo kan saindang Brgy. Hall oras na hagupon sa direktiba kan DILG.
Pigseguro pa kan DILG Secretary na cacastigohon nin suspension an arin man na alcalde asin barangay kapitan na dai masunod sa orden kan Presidente.