ISYU SA FRANQUICIA SA PRIBADONG KORPORASYON: BECA, AGMs malansar reg’l caravan vs BLPC
Malansar nin regional caravan an Bicol Electric Cooperative (BECA) asin Association of General Managers (AGMs) kan mga cooperativa nin electricidad sa rehiyon cinco sa Oktubre 21 nganing ipaheling an saindang pagkakasararo kontra sa aplikasyon kan pribadong korporasyon nin electricidad na matawan nin franquicia kan congreso na mag-operate sa Rinconada area na ngonian an may franquicia iyo an Casureco III.
Si General Manager Ann Sylvia Alsisto kan Camarines Sur I Electric Cooperative (Casureco I), Chairman kan Task Force Duterte kan Casureco III asin Presidente kan AGMs nagpahayag sa Bicol Mail na nagtatarabangan sinda sa BECA nganing ipaglaban na ibasura an aplikasyon sa franquicia kan Bicol Light and Power Corporation (BLPC) nganing magbugtak kan saindang distribution utility sa Rinconada area apesar na igwa pang siyam (9) na taon na franquicia an Casureco III sa Rinconada area.
An caravan na compuesto nin duwang grupo an enot mapuon sa Camarines Norte Electric Cooperative (Canoreco) sa Daet, Camarines Norte asin an ika-duwang grupo mapuon man sa Sorsogon I Electric Cooperative masabatan sa Casureco III sa Ciudad nin Iriga asin malibot sa bilog na Rinconada area.
LRAY NAG-REFILED KAN BILL
An aplikasyon sa franquicia kan BLPC na may House Bill No. 407 pig-refiled ni Diputado LRay Villafuerte kan segundo distrito kan CamSur alagad sa madaling panahon hinadaling aprobaran sa plenaryo kan Septiembre 24 na mayong consultasyon sa apektadong lugar maging sa mga cooperativa nin electricidad.
Yaon sa senado na ngonian Senate Bill 4437 alagad nagtutubod an BECA asin AGMs na dakul desbentahe na sasapuon kan miembros-consumedores asin sa saindang pagtubod bakong legal na paagi, sala sa presenting leyes na nag-gogobernar sa mga franquicia kan mga cooperativa nin electricidad.
Sinasabi sa house bill an gigibohon kan BLPC mapatindog asin mapaconstruhir, ma-operate asin mamantenir nin distribution utility sa ika-limang distrito kan Camarines Sur na kinababalihan nin mga municipalidades kan Bula, Bato, Baao, Nabua, Balatan asin Ciudad nin Iriga.
BLPC MAYONG KABATIRAN SA PAGPADALAGAN
NIN COMPANYA SA KURYENTE
Sinabi pa sa bill na matao suboot nin mas marhay na serbisyo alagad an pigngangalas kan BECA asin AGMs anong serbisyo an papakarhayon na mayo paman ngani sinda nin distribution line sa Casureco III?, ano an saindang itataong mas marhay na serbisyo na mayo paman ngani sinda ni sarong electrical post sa Rinconada area? asin ano an track record kan Bicol Light and Power Corporation na makakapagsabi sinda na matao nin marhay na serbisyo?. Ini sana an nagkaperang mga kahapotan ninda na magiging cuestionable sana an saindang operasyon.
Dinagdag pa na sagcod sa ngonian mayo pang prueba na an BLPC igwa nang distribution utility na pinapadalagan na nagtataong marhay na serbisyo.
An pribadong korporasyon perming an isip magpalangkaw nin singil sa tarifa nganing magkaigwa nin dakulang ingreso, malinaw sa sinasabi kan Energy Regulatory Commission (ERC) na pagnatawan nin franquicia an BLPC seguradong mapalangkaw singil sa tarifa nin kuryente sa Rinconada area na apektado an ribo-ribong consumedores, sabi man ni General Manager Fortunato ‘Ato’’ San Jose kan Casureco IV sa Partido Area.
Sa isyu na kun igwang kompetensiya puedeng maghuros an tarifa, iyan sa ibang serbisyo alagad malinaw sa EPIRA law sa ngonian bukas lang sa kompetensyon iyo an generation, an transmisyon na pugol ngonian kan National Grid Corporation of the Philippines an distribusyon siring kan ginigibo kan cooperativa nin electricidad dai pa ini bukas sa komptensiya.
An mga direktor kan pribadong korporasyon sinda an may pugol mantang sa cooperativa nin electricidad an cada distrito igwang direktor na pinapaagi sa eleksyon. (DPA)