Opisyales de barangay marecibe nang sueldo

Bako nang honoraria an marerecibe cada bulan kan mga elehidong opisyales de barangay kundi sueldo oras na maaprobaran sa congreso an Barangay Reform Act na pigsangat ni Camarines Sur 3rd District Congressman Gabriel H. Bordado Jr.

An propuestong ley enot nang pigplantiar ni Bordado kan 17th Congress alagad liwat pig-refile ngonian na 18th Congress asin pendiente na sa Local Government Committee.

Sa propuesto kan congresista an barangay kapitan dapat igwa nang salary grade 13 na dapat magrecibe nin P24 mil asin salary grade 11 sa barangay kagawad na igwang sueldong P20 mil.

Pigpanindugan niya na panahon nang tabangan an mga opisyales de barangay mientras na 24/7 an saindang trabajo na parating pighahagadan nin tabang kan mga konstituentes kan barangay maging obligasyon sa pagmantenir kan paz y orden asin iba pang serbisyo sa saindang barangay na iyo an lalawgon kan gobierno.

Kun ano an serbisyo na pigtatao ninda, reflected man ini kan pigtataong serbisyo kan mga gobierno provincial, gobierno kan ciudad maging gobierno municipal. Huli kan saindang kapagalan mas marhay na tawan sinda bakong honoraria envez sueldo, sabi pa ni Bordado.

Napag-araman na igwa man nin ibang bersyon sa senado na gibohon nang sueldohan an mga opisyales de barangay asin ini pigtutulod man ni Senador Koko Pimentel.

SA DUGANG NA SUELDO SA MANGA PARATUKDO

Kabali sa mga pigplantiar na bill kan congresista kan tercer distrito kan Camarines Sur iyo an dugang na sueldo sa mga paratukdo bako lang sa elementarya, segundarya kundi para sa tertiary education sa state colleges asin universities.

Sinabi pa ni Bordado na saiyang pigsuportaran na maaprobaran an dugang na sueldo sa uniform personnel asin sa pagtubod niya kan nakaaging 17th Congress mapapadali man an dugang na sueldo sa mga paratukdo asin nurses alagad sagcod sa ngonian pendiente pa.

Ngonian na 18th Congress pigpadagos niya an bill mantang haloy na an reclamo kan mga paratukdo sa hababang sueldo.

Siya enot nang nag-ayon sa Makabayan Block nganing suportaran an dugang na sueldo sa nurses asin paratukdo kan nakaaging 17th Congress alagad an problema sa gobierno nasasakitan na maghanap nin dakulang fondo para masusteniran an pandagdag na sueldo.

Sa piglaog sa bill kaparejo man kaidto kan uniform personnel na treinta mil peso sa malaog na bagong paratukdo asin ma-adjust naman sa mga masunod na mga level na paratukdo, sabi pa ni Bordado.

Sa ngonian igwa na siyang pigsangat na doceng house bills na gabos mapadapit sa edukasyon para sa karahayan kan paratukdo asin estudiantes asin an detalye iluluwas niya sa gigibohon na first 100 days report sa congreso. (dpa)