P56.5-M ipapautang kan DA sa mga paraoma

Pili, Camarines Sur – An Departamento de Agricultura (DA) sa Bicol nagtagama nin P56,565,000 na ipapautang sa mga paraoma sa lindong kan Expanded Survival and Recovery Assistance (SURE) program alagad an calificado sana si naapektaran kan pagbasak kan presyo nin paroy na may sarong hektarya pababa.

An pigtagamang fondo para sa total na 3,771 na benipisyaryo na papautangon sinda nin tig-a P15 mil asin igwa nang na-enot na 117 mga paraoma sa Bicol an enot nang natawan kan magbisita sa Ciudad nin Legazpi si DA Secretary William Dar na nag-total sa P1,755,000 sa paagi kan cash card/ATM.

An P15 mil sarong ‘’one time loan’’, babayadan sa laog nin walong taon na mayong penalidad o interes alagad an amortization na P1,000 babayadan cada anom na bulan asin an tabang na ini kan ahencia magian na marhay sa paraoma, sabi ni OIC Regional Technical Director for Operation Adelina A. Losa kan makuanan nin intrevista kan Bicol Mail.

Pinahayag pa ni Losa an DA igwang Registry System for Basic Sector and Agriculture (RSBSA), naheheling digdi kun siisay na mga paraoma na igwang sarong hektarya pababa asin nagkaigwa sinda nin kriterya na enot iyo an lista kan RSBA asin ika-duwa itong nasa poverty incidence na naaraman digdi si mga municipalidades.

Sa pagserne kan dapat matawan nin biyaya kan ahencia na-araman an mga calificadong municipio sagcod na pig-verificar kun sinda nakatanum ngonian na taon asin na-apektaran kan pagparababa kan presyo nin paroy.

Si dai nagtanum dai man sinda apektado kan hababang presyo kan paroy asin dai sinda calificado, sabi pa ni Losa.

An Municipal Agriculturist Officer (MAO) iyo an na-validate asin kun nakumfirmar na an mga pangaran kan paraoma asin calificado isusumiter kan DA sa Land Bank of the Philippines nganing i-andam an mga dokumentos.

Sa resulta kan validations limang mga banwaan sa Albay, gabos na banwaan kan Camarines Norte, siyam na banwaan sa Camarines Sur asin apat sa Sorsogon na igwang total na 3,771 na paraoma.

Si ibang mga paraoma na dai kabali sa SURE program matatawan man nin banhi, abuno, makinarya asin iba pang ayuda nganing gabos makinabang, sabi pa kan DA Bicol. (DPAureus)