SA ROAD CLEARING OPERATIONS: Anom na LGUs sa CamSur tinawan halangkaw na grado

Anom na municipalidades sa Camarines Sur an pigtawan nin high compliance rating kan Department of Interior and Local Government (DILG) sa memorandum kan ahencia sa road clearing alagad an sarong sadit na banwaan tinawan nin bagsak na grado.

Si Provincial Director Melody Relulicio kan DILG Camarines Sur nagpahayag sa media an mga banwaan na ini kinababalihan kan Bato, Buhi, Goa, Milaor, Sagñay asin Tigaon mantang an banwaan nin Gainza na may walo sanang barangay bagsak si tinaong grado.

An LGU Gainza tinatawan nin limang aldaw puon na marecibe an show cause order nganing magpaliwanag sa DILG kun tano ta kulang an saindang pagkumple sa direktiva ni Presidente Rodrigo Duterte.

Si dai kabali sa high compliance rating yaon na sa listahan bilang nasa medium compliance rating, sabi pa ni PD Relucio.

Dai paman sinabi kan DILG kun ano an posileng penalidad sa LGU na nagbagsak sa grado asin dapat magpaliwanag muna antes kan ano man na penalidad na iimponer kan ahencia.

An mga LGU tinawan nin 60 diyas na kaipuhan taposon an road clearing operation, alagad an ibang mga lokal na gobierno nagsabi na kulang an duwang bulan nganing totalmenteng mahali an manga ulang na estraktura sa mga gilid kan tinampo o nasa sakop kan road right of way.

An mga personajes kan DILG iyo an nagkunducir kan validation asin saindang pigsumiter ki Secretary Eduardo Año an resulta kan saindang inspeksyon.

Ipinahayag na an ibang LGUs magpapadagos kan saindang clearing operations dawa tapos na an pag-evaluar kan DILG.