2 LGUs sa CSur na bagsak sa road-clearing pinapaliwanag

An central office kan Department of Interior and Local Government sa paagi ni Sekretaryo Eduardo Año iyo an ma-isyu nin Show Cause Orders sa mga lokal na gobierno na nagpalyar asin bagsak sa grado sa ginibong pag-evaluar sa pinapa-implementar na road clearing.

Sa Camarines Sur, sinabi ni DILG Provincial Director Melody Relucio ano man na oras ipapadara ni Sekretaryo Año an orden sa duwang lokal na gobierno digdi na bagsak sa road clearing na kinababalihan kan sadit na banwaan kan Gainza asin Pili na iyo an kabisera kan CamSur.

Sa dai mahahaloy marerecibe na kan LGUs Pili asin Gainza matapos kumfirmaron ni Usec Jonathan Malaya na pinadara na an Show Cause Orders sa 101 LGU kabale an duwang banwaan sa Camarines Sur.

Tinatawan sinda nin limang aldaw na magpaliwanag nin huli sa non-compliance sa memorandum order kan DILG central office asin mismo ni Presidente Rodrigo Duterte.

Ano man na aksyon contra sa mga non-compliance sa memorandum yaon na sa desisyon ni Sekretary Año. Sinabi pa kan DILG na magpapadagos an saindang trabajo mala ngani sa Deciembre 2019 magkakaigwa sinda nin quarterly validation sa road clearing kan mga LGU.

Dinagdag pa na an Ciudad nin Naga iyo sana sa mga ciudades sa Bicol an tinawan nin low compliance rating kan DILG validation team sa rehiyon cinco.

Pigpaliwanag man ni Alcalde Nelson Legacion kan magkaigwang aktuwal inspeksyon an DILG validation team na-notaran an mga lugar sa Panganiban Drive, commercial district I area na igwang mga nakagarahing vehiculo.

An gustong mangyari kan DILG malinig an tinampo sa agihan nin tawo asin sa trafico. Alagad segun sa jefe ejecutivo nangyari ini huli ta igwang ordinansa an City Hall na nagtutugot sa sinambit na lugar bilang parking area kaya nagbaba an saindang grabo na nagpako sana sa 75 por ciento.

Saiya pang sinabi sa media na kun dai nagtugot an ciudad na maggarahe nin mga vehiculo sa centro ciertong magagadan an negosyo.

Dawa nakua sana an 75 por cientong grado an mahalaga padagos giraray an negosyo maging sa mga banking transaction kun iimplementar an bawal na paggarahe dakul an magkakapurondo asin dakulang epekto sa economia sa ciudad, sabi pa kan jefe ejecutivo.

Anom sanang mga municipalidades sa CamSur an natawan nin high compliance rating mientras na an iba nasa medium compliance rating.