Leni vs Bongbong

Amigo ko si Bongbong Marcos ta pinabisto siya sako ni dating Congressman Celso O. Baguio, naguin RTC Judge kan Gapan City, kan dekada 90 ta nagbisita si Bongbong sa Bicol sa distrito ni Congressman Baguio (an second district kan Camarines Sur kaidto) ta pareho sinda congressmen asin magkataid nin tukawan sa Batasan.

Nagdagos si Bongbong sa Villa Caceres Hotel, duman sinda naghelingan ni Celso na ipina-apod man tulos ako bilang Bokal ako kaidto para mag-inom-inom nin cerveza. Kontra sa sakuyang pagtubod como anti-Marcos kan ako estudyante pa, maboot palan asin humilde si Ferdinand Romualdez Marcor Jr.

“Todo bale yan”, sabi ni Celso.

Pero marhay magbulos-bulos ta maski halawig na panahon nakatukaw pagtindog niya garo perming plantsado an barong.

Naheling ko otro si Bongbong kan magdalaw ako sa Sarat, Ilocos Norte ta an Mayor duman, si Atty. Arabella Corazon Ruiz-Abad, esposa kaidtong depuntong Atty. Alex Abad, Nagueño, na sakong amigo entimo. Naimbitaran akong magsakat sa heritage house kan mga Edralin na partidaryo ni Mayora alagad dai ko nakaulay si Bongbong.

Naotro kan 2011 kan an grupo kan mga taga Camarines Sur sa pangengenot ni Gov. Lray Villafuerte nag-attendir sa okasyon kan kompleanyo ni depuntong Presidente Marcos. Nag-ayon kami sa celebrasyon. Nagbali kami sa parada sa banwaan kan Sarat, an banwaan ni Donya Josefa, nag-iba kami sa parada sa Batac an banwaan kan ama ni Presidente Marcos kun sain nakahutad an saiyang bangkay kan panahon asin nagparada pa kami sa Laog City kun sain namumugtak an Capitolyo kan governadora si Imee Marcos.

Sa Batac, sa old house kan mga Marcos, naimbitaran kami sa birthday ni Imee, yaon si dating Premira Dama Imelda Romualdez Marcos, yaon an saindang tugang na si Irene Araneta asin si Bongbong sa sarong lamesa nakahampang mi an mag-irina kaibanan ko kaidto si Bokal Angel Naval, Bokal Warren Señar asin an presidente kan Provincial Board Members League of the Philippines.

An tuyo mi kaidto mag lobby ki Bongbong na sorugon an samuyang paninindugan na dai mabanga an provincia nin Camarines Sur. May plano kaya kaidto an ibang grupo na isuway an Rinconada asin Partido districts sa pinakadakulang provincia kan Bicol na iyo an Camarines Sur.

Bilang chairman kan Committee of Local Government sa Senado si Bongbong nagkampi sa grupo kan “One Cam Sur.”

Uya na an siste: kan 2016 kandidato para Presidente si Mayor Rodrigo Duterte kan Davao City, an vice niya si Allan Peter Cayetano; Si Leni vice-president ni Mar Roxas kan Liberal Party asin si Marcos vice-president ni Meriam Defensor Santiago.

Maski aktibo pa ako sa media bilang program host kan GNN TV 48 pero retirado na ako sa politika. Nagtaya ako sa kandidato kan pagbabago.

Mala ta naguin guest ko sa programa nin nagkaka-apat o limang beses si Atty. Sal Panelo, si Judge Marvel Clavecilla asin Commodore Dante Jimenez kan Mariners Polytechniques Colleges Foundation, na gabos pro-Duterte.

Anom na bulan akong nag programa sa radyo pro-bono para ki Duterte, mayong suweldo mayong talent fee, saka dai naghahagad nin trabaho sa gobyerno maski manggana pa an kandidato ko.

Antes mag eleksyon kan Mayo 2016 inapod an attensiyon ko kan sakuyang agom si Baby na buhay pa kaidto. Sabi sako ma boto ako ki Duterte basta si Leni an vice-president ta, enot ehada mo, ika an nagkasal ki Leni saka ki Jessie kan mayor ka kan 1987 sa Milaor, bistado ta asin siyempre Bicolana.

Ito an deal ming mag-agom--Duterte for president, Robredo for vice-president.

Tubod akong sindang duwa an magarana.

Mala ta sinda man nanggad na para sako mayong duda.

An sakong personal na pagtubod safe si Duterte ki Leni, safe man si Leni ki Duterte. ***** Congratulations sa tulong outstanding members kan Sarong Banggi Organization International, an pinakadakulang socio-civic organization nin mga Bicolano sa kinaban. Sinda an 101st Loyalty Day Awardees kan UPLB Alumni Association na tinawan nin onra kan October 9, 2019;

1. Nazario Racoma kan Daet Camarines Norte, BS Agriculture graduate kan 1968, Masters degree in Business Administration sa UP Virata School of Business kan 1972. Sorong taon 2018 “Outstanding Golden Jubilarian awardee man siya. Siya an saro sa sampulong founder kan UP Sarong Banggi kan 1964.

2. Regional Executive Director Francisco “Toto” Milla kan DENR, Region 8, dating PENRO kan Camarins Sur, dating RED sa Region 3, dating Director for Land, graduate sa UPLB College of Forestry kan 1981.

3. Dr. Georgina Junsay Bordado, UP CA Agriculture graduate (Economics major) with Masteral and Doctoral degrees, primerong babaeng presidente kan Central Bicol State University of Agriculture (CBSUA).

Mabuhay!!!

“Sa pagkasararo may kusog.” ***** An jueting na buhay, an jueting na gadan, an jueting mabalik guiraray. Abangan an pagbabalik. Magtaraya kita nganing may pag-asa. ***** Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Ervin Borja and Ernie Verdadero.

May mga espesyal na bisita.

Diyos mabalos.

For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero Website: www.bicolmail.net